Dadgehê biryara girtina Nûriye Gulmen û Ridvan Akbaşiyê ku di serdegirtina polîsan a Navenda Çanda Îdîlê de hatibûn desteserkirin, daye. Yasemîn Karadag, Firat Kaya û Ezgî Kûl jî bi şertê kontrola edlî serbest bûne.

Hamad Hasan, Wezîrê Tenduristiyê yê Libnanê gotiye ku hejmara miriyên teqîna Bêndera Beyrûdê gihîştiye 171an û 30-40 kes jî winda ne.

Walîtiya Bedlîsê aşkere kiriye ku heta fermaneke din wan li 36 gund û gundikên bi ser Bedlîsê de derketina derve qedexe kiriye.

ÎHDya Amedê diyar kiriye k udi 6 mehên destpêka sala 2020an de 769 kes hatine desteserkirin, 132 kes hatine girtin û hêzên ewlehiyê bi ser 638 mal û kargehan de girtine.

Li Gevera Colemêrgê wesayiteke polîsan a zirxkirî qulipiye. Di encamê de 2 polîsên ji tîmen taybet mirine.

16 kesên li Bendera Beyrûdê wezîfedar bûn hatine desteserkirin. Rayedarên welêt hatine protestokirin. Chamoun, Serkonsolosa Libnanê ya li Ammanê ji ber teqînê dest ji kar berdaye.

Kutbettin Bor û Zafer Uyar ji 306 karkeran in ku qeyûmê Şaredariya Bajarê Mezin ê Wanê ew ji kar derxistine. Ji berk u sê meh in kirêya xaniyî nedaye, xwediyê xaniyî Bor ji mal avêtiye. Uyarî jî got, “Yasa, dadgeh mafê me li me vedigerîne lê şaredarî mafê me nade me.”

Komîteya Pêşîlêgirtina Îşkenceyê (CPT) ya Konseya Ewropayê îro têkildarî Tirkiyeyê du rapor aşkera kirine. Di raporê de amaje bi rewşa girtîgeha Îmraliyê û girtîgehên din ên mezin û îdiayên muameleya xirab a polîsan hatiye kirin.

Teqîna ku li Beyrûta paytexta Lubnanê pêk hatiye, bandora wê li Kibrisê jî bûye. Teqîn şibandine teqîna Hîroşîmayê û Nagazakîyê.

Saziya Tipa Edlî a Stenbolê, yekem rapora derbarê parêzerên girtî Ebrû Tîmtîk û Aytaç Unsaliyê ku di rojiya mirinê de ne aşkere kiriye. di raporêde ji bo herduyan jî hatiye gotin “ Rewşa tenduristiya wan ji bo mayîna girtîgehê guncaw nîne.”

Di betlaneya Cejna Qurbanê de rê û pireyên di bin berpirsiyariya Rêvebiriya Giştî a Rêyen Bejayî de ne û wesayîtên şaredariyê yên cemawerî wê belaş bin.

DYAyê û YEyê derbarê Osman Kavalayî de daxuyanî dane û gotine, li Tirkiyeyê “paşkevtina di qadên mafên bingehîn de me dixe nava tirs û fikaran.” Kavalayiyê ku mafparêz û karsaze ji hezar rojî zêdetir e girtî ye.

18emîn Xelatên Azadiya Fikr û Xweîfadekirinê yên Ayşenûr Zarakolûyê, îsal dane Dr. Selçûk Mizrakli, Hevşaredarê Amêdê û Gonul Ozturkoglûya mafparêz.

Ji heval, hogir û nas û dostên Kavalayî pirsine û gotine, “Ka Kavalayî bi gotinekê penase bikin.” Herî pir gotinên “wicdan û biwicdan”, “nefsbiçûk û nefsbiçûkî”, “baş û başî” û “mirov” gotine.

Wezareta Dadê aşkere kiriye, di cejnê de dê mafekî din yên girtiyan hebe ku malbatên xwe bibînin. Pêş pandemiyê hevdîtinên cejnan bi awayekî vekirî pêk dihat.

Li Mêrsînê, li ser rêya di navbera Mût û Karamanê de basa ku leşker tê de bûn, qeza kiriye. Di encama qezayê de du ajokar û 4 leşker mirine. 10 kes birîndar bûne.

Rêvebiriya Giştî ya Parkên Netewî û Parastina Xwezayê ya Girêdayî Wezareta Çandinî û Daristanan li Çewlîgê ji bo kuştina pezkoviyan destûr daye.

Dadgehekê daxwaza DMMEyê qebûl nekiriye ku DMMEyê gotibû divê cezakirina Selahattîn Demîrtaş, Hevserokê berê yê HDPyê were rakirin. Parêzerên Demîrtaşî ji bo vê biryara dadgehê serî li Dadgeha Destûrî daye.

Li Çekereka Yozgatê êrîşî karkerên kurd kirine ku ji Dêrika Çiyayê Mazî ji bo kar çûne wê dere. Mixtarên hin gundan ji bo êrîşî karkeran bikin hin kom birêxistin kirine û ji karkeran xwestine ku baca rê bidin wan.

Azmî Ateşê, karmendê Namli Marketê ya li Pangaltîya Şîşlîyê, gefa kuştinê li jineke trans a bi navê G.yê xwariye û bi şûşeyê avê yê cam êrişî wê kiriye.