Dadgeha Mafên Mirovan a Ewropayê (DMEE) serlêdana Abdûllah Ocalanî qebûl nekiriye ku ji ber di dema lêgerîna hucreya wî rastî helwesta neyênî ya gardiyanan hatibû serî lê dabû.

Hiqûqnasan û nûnerên rêxistinên mafên mirovan, êrîşa çekdarî ya li ser buroya parêzer Heval Yildiz Karasûyê li Eskîşehîrê protesto kirin.

Sal û 11 meh cezayê girtîgehê li hunermend Ferhat Tûncî hatiye birîn. Ji bo cezayên ku berê hatibûn taloqkirin wê taqîbat li Tûncî bê kirin.

Daxwaza tazmînatê ya rojnameger Denîz Yucelî ji hêla 17emîn Dadgeha Cezayê Giran a Stenbolê ve nehatiye qebûlkirin. Yucel bêyî ku îdianame ji bo wî bê hazirkirin, 367 rojan girtî mabû û paşê hatibû berdan.

Piştî 14ê Îlonê, di çar rojan de li madenan çar caran qeza çêbûye. Di encamê de kesek miriye, 12 kes birîndar bûne.

Dadgeha Destûrî biryara cezayê muebetê ya ku DGMyê ji bo Abdûllah Altûnî daye nirxandiye û biryar girtiye ku “mafê dadkirinê yê li dadgeheke serbixwe û bêalî hatiye binpêkirin.” Li gorî vê biryarê wê Altûn dîsa bê dadkirin.

Piştî karkerên avakarên Balafirgeha 3. û karkerên Cargillê, karkerên Yeşil Holdîngê jî dest bi xwenîşandanan kiriye.

Max Zirngast, rojnamegerê Avûstûryayî û Mithatcan Turetken û Hatîce Goz endamên Meclîsa Avakar a Partiya Azadiya Civakî ji hêla dadgehê ve hatine girtin.

Navenda PENa Tirkiyeyê ji bo 21ê Îlonê Roja Aştiyê ya Cîhanê daxuyaniyek belav kirine û tê de gotine: “Em neçar in ku di nava aştiyê de û bi hev re bijîn!”

Wekîlê Stenbolê yê CHPyî(Partiya Komarê ya Gelî), Enîs Berberoglû duhî êvarî ji Girtîgeha Maltepeyê ya Stenbolê derketiye.

Parêzerên malbata Kûrkûtî daxwaz kirine ku ji bo bêcezatî ji holê rabe divê polîsê Kemal Kûrkûtî kuştiye bê girtin, lê ev daxwaza wan nehatiye qebûlkirin. Kemal Kûrkût dema xwestibû biçe qada Newrozê, ji hêla polîsan ve hatibû kuştin.

Dadgehên Cezayê Giran yên 26., 36. û 37. neh akademîsyenên bi navê Derya Fırat Şannan, Engin Kılıç, Güventürk Görgülü, Özge Korkmaz, Osman Cengiz Aktar, Adil Emre Zeytinoğlu Akın Tek, Z. U. , B.S, Naciye Gülengül Altıntaş dad kirine.

Walîtîya Sêrtê îlan kiriye ku qedexeya derketina derve ya li ser pênç gund û taxên navçeya Dihê hatine rakirin.

Hanifî Bariş, Akademisyenê Aştîxwaz û parêzerê ku demeke berê ji ber nûçe li ser medyaya civakî par ve kiribûn û hatibû girtin, îro hate berdan.

Metîn Duran rojnamegerekê girtî yê nexweş e. Saziya Tiba Edlî biryar daye ji ber ku ew gelek nexweş e çênabe ew li girtîgehê bimîne. Li ser vê yekê dadgehekê biryara berdana wî daye.

Akademisyenên ji Zanîngehen Harvard, Yale, Oxford, MIT û Columbiayê piştgirî dane Osman Kavalayî û gotine, “10 meh in bêyî ku derxin dadgehê û bê îdianame girtî ye. Ev dad e? Em piştgiriya Osman Kavalayî dikin.”

Akademîsyenên ku “Danezana Em ê Nebin Şirîkên Vî Sûcî” îmze kirîn têne dadkirin. Dadgeha Cezayên Giran a 28. a Stenbolê pênc çar akademîsyen dad kirin.

Walîtîya Sêrtê diyar kiriye ku operasyoneka leşkerî dê bê kirin, ji ber wê li 5 gund û taxên navçeya Dihê derketina derve qedexe ye.

Parlamentera HDPyê Bedîa Ozgokçe Ertanê pêşniyaznameyek pêşkêşî Meclîsê kiriye ku tê de behsa fermannameya Wezareta Navxweyî dike. Wezîrê Navxweyî Soylûyî demek berê fermannameyek belav kiribû û tê de xwestibû ku li zozanan xwarin û vexwarinê li malan nehêlin û bila firotina qûtî bê kontrolkirin.

Serokkomarê Tirkiyeyê, Recep Tayyîp Erdogan li bajarê Soçîyê yê Rûsyayê bi serokê wî welatî Vladimir Putin re civiyaye.