Îmam Taşçier: Dinya kurdan yek dibîne, nabêje filan partî û bêvan partî

Nûnerên partiyên kurdan duh li Amedê kom bûn û biryar girtin ku ji bo “yekîtiya netewî ya kurdan” xebatên xwe berfirehtir û birêkûpêktir bikin.

Civîna partiyan li Navenda Giştî ya DBPyê ya Amedê pêk hatibû û nûnerên Kongreya Civaka Demokratîk (KCD), Partiya Demokratîk a Gelan (HDP), Partiya Herêmên Demokratîk (DBP), Komeleya Kurdên Demokrat ên Şoreşger (DDKD), Partiya Demokrat a Kurdistan-Tirkiye (PDK-T), Platforma Demokrat a Kurd (PDK-Bakur), Partiya Însan û Azadiyê (PÎA), Tevgera Azadî, Partiya Azadî û Partiya Komunîst a Kurdistanê (KKP) beşdar bûbûn.

Heman nûneran îro Yenîşehîra Amedê civîneke çapemeniyê li dar xist û encamnameya xwe aşkere kir.

Hevserokê KCDyê Berdan Ozturk, Hevserokên Giştî yên DBPyê Salîha Aydenîz û Keskîn Bayindir, Serokê Giştî yê KKPyê Sînan Çîftyurek, Serokê Giştî yê PÎAyê Mehmet Kamaç, Serokê PDK-Tyê Mehmet Emîn Kardaş, Parlamenterên HDPyê Îmam Taşçier, Nusretîn Maçîn û Tayîp Temel, nûner û rêveberên 10 partî û rêxistinên di deklarasyonê de cih digirin di civîna çapemeniyê de amade bûn.

Di encamnameyê de hatiye diyarkirin ku wan biryara avakarinina “Xebata Tifaqa Kurdistanî” standiye û biryarên ku hatine standin xal bi xal hatine rêzkirin:

“I-Avakirina tifaqa neteweyî li Bakurê Kurdistanê;

II-Ji bo avakirina tifaqeke mayînde, em ê çalakiyên xwe bi navê “Xebata Tifaqa Kurdistanî” bidomînin;

III-Di 18-19ê Rêbendanê de, ji bo diyarkirina bingeh, çarçove, pêkhate û rê û rêbaza avakirina tifaqa

neteweyî, dê komxebateke du rojan bê lidarxistin;

IV-Amadekariya komxebatê dê ji aliyê komîsyoneke ji 5 kesan pêk tê bê organîzekirin;

V-Deriyê me ji hemû partî û tevgerên Kurdistanî yên ku di destpêka van xebatên avakirina tifaqa neteweyî de cih negirtine re vekiriye ku ew jî werin di Xebata Tifaqa Kurdistanî de cih bigirin.”

Îmam Taşçier: Em ê dest bi xebatan bikin

Yek ji beşdarên civînê Îmam Taşçier, Parlamenterê HDPyê ji bianetê re got ku dema dinya behsa kurdan dike ferqê naxe navbera wan” û wiha berdewam kir:  “Dinya me weke hev dibîne. Nabêje filan partî û bêvan partî. Divê em jî yekîtiya xwe ava bikin.”

Taşçierî diyar kir û got di nava kurdan de sê bûyeran hiştiye ku di firk û ramanê de yekîtî çêbibe: “Yek jê dema Kobaniyê bû. Ya din êrîşa li ser Kerkûkê. Herî dawî jî me di êrîşa li ser Rojavayê ev tişt dît. Yekîti di qelb û mejiyan de çêbûye.”

Parlamenterê HDPyê destnîşan kir ku niha dora siyasetê ye û wan ji ber vê pêwîstiyê dest bi xebatan kiriye.

Em bang li partiyên din jî dikin

Îmam Taşçierî got ku wan di encamnameyê de bang li partiyên ji derve mane kiriye û vê bangewaziyê dubare dikin.

Partiyên kurdan wê  di 18 û 19ê Kanûna Paşiyê de komxebatekê pêk bîne û li gorî zanyariya ku Taşçierî da, piştî wê dê dest bi xebatên xwe yên dîplomatîk bikin. (FD)