LI STENBOLÊ WÊ DIBISTANA MUZÎKÊ YA EGÎDÊ CIMOYÊ VEBE
“Em dixwazin Egîdê Cimoyên nû derkevin”
Li Stenbolê wê Dibistana Muzîkê ya Egîdê Cimoyî vebe. Cihê dibistanê li Taxa Elmadagê ya Şîşliyê ye û di 28ê Çiriya Paşiyê de piştî bernameyeke taybet, wê dibistan dest bi kar û xebatan bike.
Bernameya navborî wê li Navenda Çandê ya Kozyatagi ya Kadikoyê pêk bê. Berhevkar û çîrokbêj Ayhan Erkmen wê di bernameyê de behsa girîngiya Egîdê Cimoyî bike. Her weha bi rêya sînevîzyonekê wê peyamên kesên Egîdo Cimoyî nas dikirin, bên nîşandan. Di dawiya bernameyê de jî wê JinMa konserekê bide.
Li Dibistana Muzîkê ya Egîdê Cimoyî wê dersên muzîkê bi rengekî sistematik bên dayîn. Li gel dersên teoriya muzîkê, her weha dersên derbarê muzîka klasîk a kurdî, dengbêjî û amûran de jî wê hebin.
Kesên di karên xwe profesyonel wê dersan bidin û her weha wê hunermend û pisporên muzîkê atolyeyan li vir li dar bixin.
Koordînatorê Dibistana Muzîkê ya Egîdê Cimoyî Kemal Yildirimî ji bianetê re behsa sedema vekirina dibistanê û armancên dibistanê kir.
Yildirimî destnîşan kir ku Stenbol ji bo gelê kurd bajarekî pir mezin e û nêzîkî 5 milyon, 5 milyon û niv kurd lê dijîn û hewcedariya zarok û ciwanên kurdan bi cihekî vî rengî heye: “Em dixwazin ciwanên kurd, gelê kurd, zarokên kurd bikaribin li Stenbolê rasterast bigihêjin çanda xwe, zimanê xwe, hunera xwe û bi giştî nasnameya xwe hîn bibin. Qadek wisa me ji bo kurdan vekir.”
Periyodeke perwerdeya li vir wê bi qasî du salan berdewam bike. Kesên ku bixwazin li dibistanê perwerde bibin, divê serî li dibistanê bidin. Kesên ku hatin hilbijartin wê dest pê bikin.
“Stenbol pir mezin e. Ji hemû derên dinyayê hunermend tên vê derê. Em vê, weke awantajekê dibînin. Em dixwazin vê awantajê ji bo çand û hunera kurdî bi kar bînin. Dersdarên vê dere jî wê dersên xwe bi kurdî bidin.”
“Egîdê Cimo ji bo muzîka kurdî pir kedeke mezin daye”
Yildirimî bi van gotinan sedema hilbijartina navê Egîdê Cimoyî aşkere kir: “Ji bo muzîka kurdî pir kedeke mezin daye. Di meseleya dengbêjiyê de cihekî girîng digire. Di Radya Erîvanê de keda wî pir mezin e. Mînakeke ji bo hemû kurdan e. Me jî li ser navê wî çêkir ku nifşên nû jî êdî wî nas bikin. Me xwest di pêşerojê de Egîdên nû derkevin.”
“Mîrê Bilûrê”: Egîdê Cimo*
(FD)
Edîtorê bianet kurdiyê ye. Ji Zaningeha Marmarayê, ji beşa Rojnamegerîyê derçûye. Li Zaningeha Marmarayê di beşa Rojnamegerîyê de masterê dike. Di rojnamaya Birgünê, Dicle Haber Ajansı (DİHA), Dem Tv, Rûdaw Tv û Sputnik Kurdistanê de wek nûçegîhan, edîtor, gerînendeyê nûçeyan û şef edîtor kar kiriye. Edîtorî û redaktoriya gelek pirtûkan kiriye. Yek ji nivîskarên “E- Kitêba Rojnamegeriya Kurdî a Dijîtal”, “Ferhengoka Kurdî-Tirkî ya Nûçegihaniya Zayenda Civakî” ye. Nivîseke wî ya lêkolînê di pirtûka “Haber Analizi ve Arşiv İncelemeleriyle Türkiye’de 9 Gazete” de hatiye weşandin. Li bianetê û Botan Internationalê, di Kargehên Medyaya Kurdî de dersên dîroka çapemeniya kurdî, rojnamegeriya mafparêz û hevpeyvînan daye. Pirtûkek bi navê "Guldesteyek ji Baxê Rewanê" (Sor Yay.), yek jî bi navê "Çîrokên Şêwra Ermenan" (Cervantes Yay.) derxistiye. Xwediyê Xelata Rojnamegeriyê ya Mûsa Anterî û Rojnamegerên Çapemeniya Azad (di beşa nûçeyên kurdî de) yê sala 2023yan e.
Diyarname 29 Reşemî: Ev rojname wê her ji çar salan carekê çap bibe
Weşana kurdî ya Radyoya Swêdê piştî 23 salan bi dawî bû: “Radyo pirek bû”
Muzîka Kurdî 2023: “Nazdar Nazdar”, Koma Amed, Şivan Perwer, hunermendên jin
“Dema em li betlaneyê bûn, rêveberiya Kurdistan24ê em ji kar derxistin”
Şaneşîn Performans: "Înfaz komediyeke absurde"
