Serokê DYAyê Trumpî îmze avêtiye bin wê yasayê ku firotina balafirên şer ên bi navê F35an ji bo Tirkiyeyê dide sekinandin.

Wezareta Navxweyî aşkere kiriye ku di hefteya dawiyê de lêkolîn li ser 402 hesabên medyaya civakî hatiye kirin û lêpirsîn ji bo 292 hesaban hatiye destpêkirin.

Jinên ku bi zarokên xwe re li Girtîgeha Tîpa T a Tokatê dimînin, ji Gergerlîoglûyî re name şandine û gotine; “Piştî du mehan mamayan didin, heta ku didin kevn dibin. Pêlîstokên zarokan hatine qedexekirin. Qe ne be bila kursiyên mamaxwarinê bidin…”

Piştî ku nirxê dolar û euroyî li hemberî pereyê tirkan zêde bû û vê rewşê bandora xwe li bihayê xaza siruştî û elektrîkê kir, li Dîlokê karkerên tekstîlê ji kar têne avêtin.

Wekîlê HDPyê yê kevin Edîp Berk û endama Meclîsa Partiyê Gulşen Ozer hatine desteserkirin.

Midûriyeta Giştî ya Emniyetê aşkere kiriye ku bi hinceta “manîpulasyonê li ser nirxê dolarî dikin û nêrîneke neyênî çêdikin” wan lêpirsîn ji bo 346 hesabên medyaya civakî dane destpêkirin.

Aborînasê Marksîst ê Misrî Samîr Amîn di 86 saliya xwe de li Parîsê miriye.

Serokê DYAyê Trumpî gotiye; “Di vê dema ku nirxê lîra tirkan li hember dolarê me bi lezûbezî dikeve, min destûr da ku bacên gumrikê yên ji bazirganîya berhemên alîmînyum û pola yên tirkan tên standin, du qat werin zêde kirin.”

Bulent Tezcan, berdevkê berê yê CHPyê di nava rêveberiya nû de cî negirtiye. Li şûna wî Faîk Oztrak bûye berdevk. Hejmara alîkarên serokê giştî derketiye 19an.

Li navçeya İkizce ya Ordûyê ji ber lehiyê kesê bi navê Bayram Sekmen miriye.

Serokomar Erdoganî diyar kiriye ku kampanyayên curbecur tên meşandin û wiha berdewam kiriye: “Heke ku yê wan dolarê wan hebe, yê me jî Xwedayê me heye.” Tebaxa 2017ê weke îro dolarek beramberî 4,67 lîreyên tirkan bû, lê vê sibê dolarek dike 6,20 lîreyên tirkan.

HDP, İHD û ÖHPyê ji bo êrîşa li Geverê daxwaza avakirina komisyanê li Meclîsê kirin. Di wê êrîşê de Nûrcan Karakaya û kurê wê yê 11 mehî Bedirhan Karakaya miribûn.