Polîsan bi ser malên rojnameger, siyasetmedar û parêzeran de girtine û gelek kes desteserkirine

Ji bo nûçeya tirkî bitikîne

Di çarçoveya lêpirsîna ku navenda wê Amed e polîsan li 21 bajaran bi ser malan de girtine. Di encama serdegirtinan de rojnameger, siyasetmedar, parêzer û hunermend jî di nav de gelek kes hatine desteserkirin.

Di encama serdegirtinên li Amed, Mêrdîn, Sêrt, Çêwlig, Wan, Şirnex, Êlih, Dîlok, Riha, Bursa, Stenbol, Îzmîr, Mêrsîn, Mûş, Bedlîs, Colemêrg, Osmaniye, Sêwas, Meletî, Semsûr û Enqereyê de polîsan dest danîne ser hinek pirtûk û materyalên dijîtal.

Di encama serdegirtinan de heta niha herî kêm 126 kes hatine desteserkirin. Diyar bûye ku kesên hatine desteserkirin bi îdiaya ku “endamtên rêxistinê” tên tawanbarkirin. Her wiha hatiye zanîn ku di çarçoveya lêpirsînê de derheqê gelek kesên din de jî biryara girtinê heye.

Navên hinek kesên hatine desteserkirin wiha ne:

“Edîtorê Ajansa Mezopotamyayê (MA) Abdurrahman Gok, nûçegihanên MA’yê Ahmet Kanbal û Mehmet Şah Oruç, Edîtora JINNEWS’ê Berîtan Canozer, Midûrê Karên Nivîsan ê Rojnameya Yenî Yaşamê Osman Akin, Xwediyê Îmtiyazê yê Rojnameya Xwebûnê Kadrî Esen, rojnameger Mehmet Yalçin, Mîkaîl Barût, Salih Keleş û Remzî Akkaya, Cîgirê Hevserokê Giştî yê ji Komîsyona Rêxistinkirina Navendî ya HDP’ê Ozlem Gunduz, Hevberdevkê Komîsyona Rêxistinkirina Navendî ya HDP’ê Mahfûz Guleryuz, Mehmet Oner, Halîse Dakal, Resûl Temûr, Pîrozhan Karalî, Muhîttîn Muguç, Ozum Vurgun, Bunyamîn Şeker, Firat Taşkin, Zozan Acar, Buşra Eylul Ozgultekîn, Burhan Arta, Jiyan Sametoglû, Metîn Ozbadem, Gurbet Ozbey Oner, Adîle Salman, Şerzan Yelboga, Suleyman Şahîn, Gulistan Ataş, Firat Yildiz, Serhat Hezer, Kenan Angay, Şîrîn Şen, Bahar Oktay, Berdan Acun, Havva Bîldîk, Halîl Delen, Habat Mîmkara, Devrîm Demîr, Yavuz Akkuzu, Ozcan Ateş, Elvan Koçer Yildirim, Şahperi Alphan, Sezen Mercan, Marîa Oztopuz, Sûat Mustafa Şencî, Veysel Moray, Husamettîn Kiliç, Şehmûs Karadag, Semîra Akkor, Faris Turk, Tarik Zafer Yazgan, Nûrettîn Bakan, Nasîp Gultekin, Eşref Yaşa, Alattîn Zugurlî, Hamdullah Zugurlî, Dogan Hatun, Rifat Ronî, Ganî Alkan, Sezgîn Bayram, Sena Ozbey, Şahperî Alphan Bayhan, Sadettîn Înal, Kîbar Suvarî, Velat Ersîn, Kevve Çelîk, Mahîr Yildiz, Mesut Gever, Abdulvahap Irmak û Mesût Baskin. Avesta Gulistan Uçar, Muslum Şahînsoy, Mehmet Noyan, Muhsîn Acar û Amara Yurek.”

Xwediyê Îmtiyazê yê Ajansa Mezopotamyayê (MA) Ferhat Çelîk ji ber ku li navnîşana ku polîsan bi ser de girtine nebûye, nehatiye desteserkirin. Lêgerîna li gelek navnîşanan didome.

Têkildarî desteserkirinan xebatkarê MAyê Azad Altayî wiha gotiye: "Li Amedê bi ser mala me de girtin, lêgerîn dewam dike, ji bo gelek kesan biryara desteserkirinê heye."

Her weha polîsan bi ser Komeleya OHDyê de jî girtine û gelek parêzer desteserkirine.

HDPyî û parezer jî desteserkirine

Cîgirê Hevserokê Giştî yê Partiya Demokratîk a Gelan (HDP) Tayîp Temel li ser hesaba xwe ya medyaya civakî bertek nîşan daye û wiha gotiye: “Di erefeya hilbijartinê de desthilatê ji ber tirsa windakirinê, dîsa serî li operasyonên desteserkirinê daye. Di nav de endamên MYKa partiya me, cîgirên hevserokan, rojnameger, hunermend û parêzer jî, bi dehan hevalên me li Amedê hatin desteserkirin."

"Hûn dê nekarin xwe ji têkçûnê xelas bikin!”

‘Zêdetirî 150 kes hatine desteserkirin’

Cîgirê Serokê Baroya Amedê Mehdî Ozdemîr diyar kiriye ku li ser fermana Serdozgerê Komarê herî kêm 150 kes hatine desteserkirin û ev agahî parve kiriye: “Operasyon hêj berdewam e. Binçavkirin hêjn didomin. Lêgerînên li buroyên gelek hevalên me berdewam in. Heta niha jî têkildarî sedema serdegirtinan tu agahî nehatine diyarkirin. Sedemekê ku ji me re hatiye gotin tune ye. Operasyonl i dijî komên pîşeyî hatiye kirin. Di nav de hunermend, siyasetmedar, nûnerên rêxistinên civaka sivîl û parêzer jî hene. Lêpirsîneke giştî ye.”

Riha

Di encama serdegirtinên li Rihayê de jî herî kêm 4 kes hatine desteserkirin. Di serdegirtinên li Sêweregê de endamê OHDê parêzer Metîn Ozbadem û siyasetmedar Halîl Delen, Havva Bîldîk û Habat Mîmkara hatin desteserkirin. Di çarçoveya heman dosyayê de li navçeyên Pirsûs û Wêranşarê jî bi ser gelek malan de hate girtin û diyar bûye ku li wan navçeyan jî desteserkirin hene.

OHD: Ji bo 24 saetan biryara bisînorkirinê heye

Komeleya Hiqûqnasên ji bo Azadiyê (OHD) jî têkildarî mijarê li ser hesaba xwe yê medyaya civakî ragihandiye ku li bajarên Amed, Êlih û Rihayê rojnameger, siyasetmedar û welatî hatine desteserkirin û weha gotiye:

“Îro di danê sibehê di çarçoveya lêpirsîna navenda wê Amedê de bi ser malên gelek endamên me de hate girtin. Lêgerînên li avahiya komeleya me didome. Em ê li dijî vê operasyona siyasî ya di dema hilbijartinê de li dijî komele û endamên me hatiye kirin bêdeng nebin! Di çarçoveya heman dosyayê de li gel endamên me, her wiha li Amed, Êlih û Rihayê jî rojnameger, siyasetmedar, hunermend û welatî hatine binçavkirin. Em ê li dijî vê operasyona siyasî ya li dijî komeleya me û saziyên din ên demokratîk hatiye kirin bêdeng nebin! Derheqê endam û miwekîlên me yên hatine binçavkirin de ji bo 24 saetan biryara bisînorkirina hevdîtinê hatiye dayîn. Operasyonên siyasî, bisînorkirinên nerewa û zext dê nekarin me têk bibin. Parastein dê bêdeng nebe! Em ê li gel endam, hempîşe û miwekîlên xwe bin!”

Baroya Amedê: Biryara nepenîtiyê hatiye girtin

Baroya Amedê jî bertek nîşanî desteserkirina daye û wiha gotiye:

“Di çarçoveya lêpirsîna Serdozgeriya Komarî ya Amedê de û biryara lêgerîn û desteserkirinê ya 3emîn Dadgeriya Cezê û Aştiyê ya Amedê de îro di danê sibehê bi ser malên endamên buroya me, rojnameger û mafparêzan de hatiye girtin û desteserkirin û girtin çêbûne."

"Bi awayekî pir keyfî mafên bingehîn û azadiyan binpê dikin, di serî de parêzer, mafparêz û rêxistinên pîşeyî, rêxistinên civaka sivîl hedef tên girtin, rastî gefên cezakirinê tên. Tê dîtin ku tevdîrên parastinê yên weke girtin û binçavkirinê li dijî parastvanên mafan bi awayekî pir bêwate, nebikêr, bêperwa û xerab tê bikaranîn. Her wiha biryara qedexeya hevdîtina bi parêzeran re hatiye dayîn û ji bo dosyayê jî biryara nepeniyê hatiye dayîn. Divê têkildarî sedema binçavkirinan di zûtirin demê de bê eşkerekirin. Divê tavilê dawî li van sepanên derhiqûqî ku mafên azadî û ewlehiyê binpê dikin ên li dijî hempîşeyên me, rojnameger û parastvanên mafan bînin û wan berdin.”

(TY/AS/AY)