Înîsiyatîfa Mamosteyên Kurdî: Divê zimanê kurdî bibe zimanê perwerdehiyê

Fotograf: Twitter

Ji bo nûçeya tirkî bitikîne  

Înîsiyatîfa Mamosteyên Kurdî têkildarî tayînkirina mamosteyên kurdî daxuyaniyek nivîskî weşandiye.

Her sal zêdeyî 100 kesî beşa zimanê kurdî diqedîne

Înîsiyatîfê di daxuyaniyê de wiha gotiye: “Di roja 26.01.2011an de Lijneya Xwendina Bilind (YOK) vebûna beşên ziman û edebîyata Kurdî pesend kir. Bi biryara YOKê re li Zanîngeha Artûklû ya Mêrdînê, Zanîngeha Muş Alparslanê û Zanîngeha Bîngolê beşên ziman û edebîyata Kurdî vebûn. Li gel vana dîsa li Zanîngeha Çewligê û li Zanîngeha Mûnzûrê ya Dersimê beşên ziman û edebîyata Zazakî hatin vekirin. Heta niha bi sedan xwendekaran ev beşana qedandine û bawernameya lîsansê wergirtine. Hê jî her sal zêdeyî 100 kesî van beşan di qedîn e.”

Wezareta Perwerdeyê salê 2-3 kesî tayîn dike

Însiyatifê diyar kiriye û gotiye,”Mixabin Wezareta Perwerdeyê salê 2-3 kesan ji van mamosteyan wezîfedar dike. Lİ gel ewqas mezûn û xwendekarên Kurd yên li dibistanên seretayî û navendî, em vê hejmarê kêm dibînin û daxwaz dikin ku di demeke nêz de hem mamoste hem jî xwendekar bigîhêjin mafê xwe yê rewa.”

Divê zimanê kurdî bibe zimanê perwerdeyê

Her weha Însiyatifa Mamosteyan bang li xwedî û berpirsên kolêj û kreşên li bajarên bi piranî Kurd lê dijîn e ku di mufredatên wan de dersên Îngilîzî, Erebî, Fransî û hwd. hene kiriye û gotiye, “Daxwaza me ew e ku Kurdî jî têxin nav perwerdehiya xwe ya pirzimanî.”

“Em daxwazê ji hemû nûnerên siyasî, saziyên ziman û çanda kurdî, saziyên sivîl, berpirsên komeleyan û rewşenbîrên Kurd dikin ku ji her demê bêtir îro xwedî li zimanê Kurdî derkevin.”(RT/AY/FD)