10 amîralên teqawitkirî ji ber danezana “Montroyê” hatine desteserkirin

Fotograf: AA

Ji bo nûçeya tirkî  1 / 2 / ingilîzî bitikîne

Di çarçoveya lêpirsîna têkildarî“Danezana Montroyê” de 10 gumanbar hatine desteserkirin. Lêpirsîn Serdozgeriya Komarî ya Enqereyê dayê destpêkirin. 103 amîralên teqawitkirî daxuyaniyek hevbeş derbarê Peymana Montroyê de belav kiribûn.

Serdozgeriyê derbarê amîralên desteserkirî de daxuyanî daye û gotiye, li gor xala 316/1 ya Qanûna Cezayan a Tirkan bi tohmeta ku “Ji bo pêkanîna sûc li dijî sîstema destûra bingehîn û ewlekariya dewletê rêkeftin çêkirine” lêpirsîn hatiye destpêkirin.

Amîralên teqawitkirî yên hatine desteserkirin ev in:

Ergun Mengî, Atîlla Kezek, Alaettin Sevîm, Ramazan Cem Gurdeniz, Nadîrr Hakan Eraydin, Bulent Olcay, Kadîr Sağdiç, Turker Erturk, Turgay Erdag û Ali Sadî Unsal.

Amîralên ku ji aliyê polîsên Şûbeya Tekoşîna Li Dijî Terorê  hatibûn desteserkirin birine Midiriyeta Emnîyeta Stenbolê kul i Taxa Vatana Stenbolê ye.

Li gorî nûçeya Ajansa Anadolûyê di lêpirsînê de ji 4 gumanbaran re teblîgat hatiye şandin ku divê di nava 3 rojan de biçin emnîyetê.

Çi bûbû ?

103 amîralên teqawitkirî yên Tirkiyeyî roja Yekşema 4ê Nîsana 2021ê derbarê Peymana Montroyê de danezaneke hevbeş belav kiribûn. Di danezanê de hatibû diyarkirin ku Peymana Montroyê ji bo Tirkiyeyê destkevtek e û mafên Tirkiyeyê bi baştirîn şêweyê diparêze.

Di danezanê de weha hatibû gotin:

“Montro, ne tenê peymaneke ku derbasbûna ji Tengava Tirkan bi rê ve dibe, di heman demê de  tevahî mafên serweriya Tirkiyeyê yên li Stenbol, Canakkale, Deryaya Marmarayê û Tengavan daye bidestxistin û serketineke mezin a dîplomasiyê ye ku bûye temamkerê Peymana Aştiyê ya Lozanê.”

 "Montroyê, derfet çêkiriyê ku Tirkiye di Şerê Duyemîn ê Cîhanê de bêalîbûna xwe biparêze. Ji ber van sedeman em di wê baweriyê de ne divê rê neye dayîn Peymana Montroyê bibe mijara nîqaşan ku di mayîndetiya Tirkiyeyê de xwedî cîhekî grîng e.”

Bertekên hatibûn nişandan

Suleyman Soylû, Wezîrê Navxweyî û Mevlût Çavûşoglû, Wezîrê Karên Derve jî di nav de gelek rayedarên dewletê bertek nîşanî danezanê dane û gotine, “tê wateya darbeyê”. Devlet Bahçelî, Serokê Giştî ê MHPyê gotiye, “Divê lêpirsîna îdarî û edlî ya pir alî derbarê danezanê de were kirin. Ahmet Davûtoglû, Serokê Giştî ê Partiya Pêşerojê jî piştgirî daye desthilatê.

Siyasetmedarên mixalefetê jî bertek nîşanî desthilata ku danezana Montroyê weke “darbe” binavkiriye, dane. Partiya Demokratîk a Gelan(HDP) jî li ser hesabê xwe yê Twîtterê daxuyanî daye û weha gotiye: “'Helwesta me ya li dijî darbexwaz û helwestên ku demokrasî û azadiyan dikin armanc, her tim zelal e.''

Serdozgeriya Komarî a Enqereyê di heman rojê de derbarê amîralên ku pêşengtiya danezanê kirine de lêpirsîn dabû destpêkirin.

(EMK/AY)