Li gorî agahiyên AAyê di encama hewldana derbekirinê ku di 15ê Tîrmehê de pêk hat de li Enqere, Stenbol, Mugla û Meletiyê 62 jê polês, 5 jê leşker û 172 jî sivîl bi temamî 240 kesan hatin kuştin.

Ji hêla kesên ku xwe weke ‘Bu Aziz Vatanin Yigitleri’ ve pankarteke mezin li Taksim AKMyê hat daliqandin û daxwaz hat kirin ku cezayê darvekirinê dîsa di nav qanûnnameyê de cih bigire.

Kovara qerf û henekan a Lemanê, dê îro hejmara xwe ya ‘’taybet li ser derbeyê’’ belav bibûya, polîsan li çapxaneyê belavkirina Lemanê asteng kir.

Rojnameger Mistefa Mihemmed ku di 13ê Tîrmehê de li Minbicê pê li mayînê kiribû û di encamê de bi giranî birîndar bûbû, li nexweşxaneyê canê xwe ji dest da.

Wezareta Perwerdehiyê (MEB) ragihand ku derbarê 15 hezar û 200 kermend ji wezîfeyê hatiye dûrxistin û derbarê wan de lêpirsîn dane destpêkirin.

YOKê xwest hemî serokên fakulteyên 1176 zanîngehên dewletê û 401 zanîngehên weqfan dest ji karê xwe berdin.

Serokatiya Karên Diyanetê daxuyand ku cenazeyên wan kesên ku di hewldana derbekirinê de cih girtine, wê ti xizmet neyê kirin.

RTUKê dîyar kir, wê destûra weşanê ya 25 radyo û televîzyonan betal kiriye ku ew piştgiriyê didin cemaeta Gûlenî an jî bi wê cemaetê re têkildar in.

Berdevkê Pentagonê Peter Cook got ku hewldana derbekirinê ku li Tirkiyeyê pêk hatiye bo wan jî surprîz bûye.Berdevkê Wezareta Karên Derve Mark Toner jî derbarê Fetullah Gulen de got: ‘Qasê ku em dizanin ew li Pennsylvaniayê li mala xwe û di halê xwe de dijî.’

IHD û TIHVyê nerazîbûna xwe nîşan da ku li xwenîşandanan xwenîşander dibêjin ew ‘’cezayê bidarvekirinê’’ dixwazin û rayedar jî dibêjin ew ê ‘’li ser vê daxwazê kar bikin’’

Serokwezîr, Bînalî Yildirim û serokê CHPyê li Qesra Çankayayê civiyan û piştî civînê daxuyaniyeka hevpar xwend.

Piştî hewldana derbekirinê di encama operasyonên pêk hat de heta niha bi hezaran leşker û polês hatine binçavkirin û gelek leşkerên pilebilend jî tê de bi sedan leşker hatin girtin.

Recep Tayyîp Erdoganê serokkomar projeyên xwe yên ji bo Taksîmê eşkere kirin: Qişleya top berdanê, avahiya opêrayê, mizyeft.

Dudî nîvê şevê komek êrîşkaran êrîş li ser rojnameya Gazetem Istanbulê kiriye.

Li gor daxuyaniya dawiyê ya serokwezîr, Bînalî Yildirimî di hewildana derbekirinê de 232 kes mirine, 7 hezar û 543 kes hatine desteserkirin, 316 ji desteserkiriyan hatine girtin. Karê 2 hezar û 756 dadger û dozger û karmendên dî yên dadgehan hatiye sekinandin, karê hezar û 500 karmendên karên civakî dikin hatine sekinandin.

Serokkomar, Erdogan û serokwezîr, Yildirimî duhî dîsa bangî welatiyan kir ku li meydanan kom bibin, welatî li gelek bajaran li meydanan kom bûn.

TIBê malpera haberdar.comê girt, biryara desteserkirina Arzu Yildiza berpirsa malperê ya nivîsîngeha Enqereyê, hatiye dayin.

Serokê YOKê bangî serokên hemî zanîngehan kir û da zanîn li ser mijara ‘’paqijkirina civaka zanyaran’’ dê kombûn çêbibe.

Serşêwirmendê serokkomarî, Şeref Malkoçî diyar kir ku ew ê rêya standina destûra çekkirînê xweş bikin. Malkoçî da zanîn ‘’kuştin bi çekên bêdestûr tên kirin.’’

Serokkomar, Recep Tayyîp Erdogan li ber deriyê mala xwe ya li Kisikliyê axivî. Welatiyên li ber deriyê wî kom bûyîn dirûşmên ‘’em dixwazin îdam bê’’ gotin li ser vê yekê serokkomarî got ‘’em nikarin daxwaza we tine bihesibînin.’’