Li bajarê Wanê dema leşker di dewriyeyê de bûne êrîşeka çekdarî li wan hatiye kirin. Leşkerekê birîndar bûyî li nexweşxaneyê miriye.

Walîtîya Stenbolê ragihandiye ku 34 hezar û 397 penaber li navendê vegerandinê disekinin ku ew ê ji bo bajarên wan bêne şandin.

Li şûna Semîre Nergiza Şaredara Nisêbînê ya HDPyî Qaymeqamê Nisêbînê Mehmet Balikçilar hatiye wezîfedarkirin. Li şûna şaredarê Colemêrgê, walîyê wî bajarî İdris Akbıyık hatiye erkdarkirin.

9ê Çiriya Pêşîyê(meha 10.) Tirkiyeyê li Rojavayê dest bi operasyonekê kiribû, duhî cîgirê serokê Amerîkayê ragihandiye ku Tirkiye dê êrişa xwe ya li ser Rojavayê rawestîne û YPG jî di nav 120 demjimêran de ji navçeya aram derkeve.

Serokomar Erdogan û Alîkarê Serokê DYAyê Pence li Enqereyê kom bûne. Pence gotiye “DYA û Tirkiyeyê ji bo agirbestê li hev kiriye.”

Sînan Çîftyurek, Serokê Giştî yê KKPyê bi şertê kontrola edlî serbest bûye.

Li gor nûçeyeka ajansa nûçeyan a Sûriyeyê ya bi navê SANA serokkomarê Sûriyeyê Beşşar Esadî ji bo operasyona Tirkiyeyê ya li rojavayê gotiye “dagirkerî” û diyar kiriye ew ê bi amûrên meşrû bersiva dagirkirinê bidin.

Cîhan Karaman, Hevşaredarê Colemêrgê hatiye girtin. Karaman 15ê Çiriya Pêşiyê hatibû desteserkirin.

Li Amedê Weqfa Koçberiyê û Alîkariya Mirovî (GIYAV) Kargeha Mafên Zarokan li dar xistiye û di bin banê kargehê de 20 zarokên paşwend bi xêz û çîrokan behsa mafên xwe kiriye. Çîrokên zarokan bi navê “Mafên Zarokan” weke pirtûk hatiye çapkirin.

Wezîrê karên derve yê Tirkiyeyê, Mevlud Çavuşogluyî di bernameya BBCyê ya bi navê Hard Talk de gotiye heke Artêşa Sûriyeyê YPGyê derbêxe ew ê nebêjin na.

Berdevkê serokatîya dewleta Rûsyayê, Dmitri Sergeyeviç Peskovî li ser nameya ku serokê DYAyê ji serokkomarê Tirkiyeyê re rêkirî gotiye: Em hînî vî şêweyê peywendîyan nebûne.

Merkel, Serokwezîra Almanyayê gotiye “Min di rojên dawiyê de Tirkiye bi tund hişyar kiriye ku operasyona li dijî artêşa kurdan bide sekinandin” û min gotiye “ev drameke mirovî ye.”

Li sê bajaran 7 kes, ji ber parvekirinên xwe yên li ser medyaya civakî hatine girtin.

Wekîla berê ya Partiya Gelan a Demokratîk (HDP), Burcu Çelik Ozkanê 7 sal 3 meh û 10 roj sal cezayê girtinê standibû, Dadgeha Bilind biryara dadgeha herêmî betal kiriye û xwestiye Ozkan demildest bê tehlîyekirin. Li ser vê yekê şeva dî Ozkan ji girtîgehê hatiye tehlîyekirin.

Li navçeya Kaniya Xezalan û Serêkaniyê hemû dibistan, li Pirsûs û Bêrecûkê jî dibistanên li herêmên li ser sînorî, li 55 gund û gundikên navçeya Hezex, Cizîr û Silopyayê jî dibistanên li herêmên li ser sînorî wê du rojan bên girtin.

9ê Çiriya Pêşîyê(meha 10.) Tirkiyeyê li Rojavayê dest bi operasyonekê kiribû, di hena rojê de serokê Dewletên Yekbûyî yên Amerîkayê (DYA) nameyek ji serokkomarê Tirkiyeyê Recep Tayyip Erdoganî re şandiye û jê re gotiye “ehmeqîyan neke!”

Li Nisêbînî hemû dibistan, li Artûklû û Qoserê jî li herêmên nêzîkî sînor wê dibistan ji bo du rojan bên girtin.

Ahmet Turk, Hevşaredarê Bajarê Mezinê yê Mêrdînê li dozgeriyê gotiye, “bi têkiliya kevnare ya hezar salan a gelê tirk û kurd û biratî/xwişkiya gelan” daxwaza aştî û demokrasiyê bilêv kiriye.

Serokkomarê Tirkiyeyê û serokê Partiya Edalet û Pêşketinê (AKP) Recep Tayyip Erdoganî îro di civîna partiya xwe de gotiye “heke terorîst biçin operasyon dê bê sekinandin.”

Ji 186 kesên ku bi hinceta li ser medyaya civakî li dijî “Herekata Kaniya Aştiyê” propaganda kirine hatibûn binçavkirin 24 kes hatin girtin.