Dîcle Muftuoglû, Hevseroka DFGê û edîtora Ajansa Mezopotamyayê ji ber ku wêneyek di hesabê xwe yê medya civakî de belav kiriye bi îdiaya “propaganda rêxistinê kiriye” salek û 3 meh cezayê hepsê lê hatiye birîn.

Walîtiya Colemêrgê biryar daye û aşkere kiriye ku heta 15 rojan hemû çalakiyên weke xwenîşandan, mitîng, civînên li cihên vekirî û yên weke wan hatine qedexekirin.

Parêzeran li Stenbol, Îzmîr û Mêrsînê Tahîr Elçî, Serokê Baroya Amedê bibîranîne ku pênc sal berê hatibû qetilkirin.

Suleyman Soylû, Wezîrê Karûbarên Navxweyî derbarê Osman Şîbanî de axiviye û gotiye, piştî hatibû desteserkirin, hatibû gotin ku ji helîkopterê hatiye avêtin. Soylûyî gotiye: “Di lêpirsînnameya me de çi hebe em ê emcana wê deynin ortê.”

Feleknas Ûca, Parlamentera HDPê rewşa jinên ku li Efrinê ji aliyê komên çekdar ve hatine revandin ji Mevlût Çavûşoglû,Wezîrê Karên Derve pirsî ye.

Li Stenbolê polîsan, rojnameger Davut Uçar û Kesire Onel, Alîkarê Şaredarê Şişliyê Cihan Yavuz jî di nav de, rêveber û endamên HDK, HDPê û yên çend saziyên civaka sivîl desteser kirine.

Di rapora OHD û TUAY-DERê de hatiye diyarkirin ku di girtîgehan de bi qasî ku pêdivî pê heye divê karmendên tenduristiyê hebin û hejmara wan bên zêdekirin.

Di çarçoveya lêpirsîna derbarê KCDê de Dr. Şeyhmus Gokalp, Endamê Lijneya Rûmetê yê TTByê jî di nav de 5 kes bi sûcê “endamtiya rêxistinê” hatine girtin. Di çarçoveya wê lêpirsînê de 72 kes hatibûn desteserkirin.

Li dijî Dayik/Mirovên Şemiyê doz hatiye vekirin. Îdianame ji ber zabitnameya polîsan hatiye amadekirin û hatiye îdiakirin ku li gorî Qanûna Civînan û Meşên Xwenîşandanan sûc kirine.

Walîtiya Mêrdînê ya ku di 12ê Çiriya Paşiyê de biryara qedexikiran çalakî, bername û şahiyan dabû, bêyî li benda bidawîhatine demê bimîne, careke din heta mehekê hemû çalakî, bername û şahî qedexe kiriye.

Li Amedê, di çarçoveya lêpirsîna KCDê de, Bunyamîn Şeker, Hevserokê Giştî yê OHDê jî di nav de 17 parêzer di serdegirtinên malan de hatine desteserkirin.

Komîsyona Girtîgehên Navendî ya ÎHDê gotiye, “Vîrusa Covîd-19ê, ji bo kesên ku nexweşiyên kronik pê re ne dibe sedema mirinê. Li piştî 15ê Nîsanê 4 girtiyên nexweş ku temenê wan li ser 70yî di girtîgehan de mirine.”

Li gor daxuyaniya Wezareta Berevaniyê, li Heftanînê di encama qezayekê de 2 leşker mirine, yek jî birîndar bûye.

Festîvala Fîlman a Meletiyê di metna çapemeniyê ya ku belav kirî de xelata “Baştirîn Lîstikvan” weke “bêzayend” pênase kiriye. Ji ber vê yekê Şaredariya Meletiyê gotiye têgeha “bê zayend” ji nirxên me dûre û festîval betal kiriye.

Dadgehê biryara beraeta wî polîsî daye ku di Newrozê de Kemal Kurkut kuştibû.

Bi sedema ku li Cizîrê “doktorî” kiriye cezayê girtîgehê li Dr. Serdar Kuniyî birîbûn. Di encama îtirazê de dadgehkirin dîsa pêk hatiye û dadgehê heman ceza li Kuniyî biriye.

Komîteya Wezîran a Konseya Ewropayê ku pêkanîna biryarên DMMEyê kontrol dike, ji Tirkiyeyê têkildarî 15 dozan rapor xwestiye.

Walîtiya Colemêrgê aşkere kiriye ku li navenda Colemêrgê, li hemû navçe û gundan heta 15 rojan hemû çalakî, bername û şahî hatine qedexekirin.

Ji bo Seyîd Riza û hevalên wî yên yên 83 sal bere hatine darvekirin, li Dêrsim, Enqere, Elezîz û Mêrsînê merasîmên bîranînê li dar ketine.

Meclîsa Tenduristiya Karkeran û Ewheliya Karî (ISIG) aşkere kiriye ku di 8 mehên dawiyê de herî hindik 368 karker ji ber Covid-19ê mirine.