Duyemîn danişîna doza qetilkirina Malbata Dedeogûllari pêk hatiye. Parêzeran xwestiye dadgerê dozê were guhertin. Heyeta Dadgehê danişîn taloq kiriye.

41 kes bi hinceta ku “li dijî qanûna hejmar 2911ê”, “pesindayîna sûc û sûcdaran û “ziyana li mal û milkan” hatibûn desteserkirin.

Bi hezaran kes li Qoserê zêdebûna bihayê elektrîkê protesto kiriye. Polîsan bi ava şid û gaza rondikrij midaxele li çalakvanan kirine.

Biden, Serokê DYAyê diyar kiriye û gotiye, “Duh êvarê artêşa DYAyê bi fermana min operasyoneke serkevtî li dijî teröre pêkanî. Me Ebû Ibarhîm el Haşîmî el Kureyşiyî, Serokê DAIŞê li qada şer jinavbir.”

Polîsan bi ser avahiya Şaxa IHDya Amedê ve girtiye. Her weha polîsan avahî dorpêç kirine û lêgerîn dane destpêkirin. Ferhat Berkpinar, endamê Lijneya Rêvebiriya Şaxa IHDya Amedê desteser kirine.

Komîteya Wezîran a Konseya Ewropayê, ji bo Tirkiyeyê “pêvajoya binpêkirinan” daye destpêkirin. Dosyeyê wê bişînin ber destê DMMEyê.

Li Îpsala, navçeya Edîrneyê ku li ser sînorê Yewnanistanê ye, 9 penaber ji ber seqem û sermayê mirin e.

Onûr Gencer, bi sedema “ewlekariyê” serî li CIMERê daye û xwestiye dadgehkirina wî li Qeyseriyê bidome.

Rêxistina şaxa Stenbolê ya HDPyê tevlî parlamenterên HDPyê li dijî qedexekirina muzîka kurdî, civîneke çapemeniyê li dar xistiye. Parlamenter li ber Lîseya Galatasarayê hatine bav hev û li ber muzîka kurdî govend gerandine.

Parlamentera HDPyê Meral Daniş Beştaşê gotiye: "Polîsên ku tundkariya li ser jinan asteng nakin, ji ber ku bi kurdî stran strane, komekê asteng dikin, qedexe dikin. Hûn nikarin yek van zimanên qedîm qedexe bikin.”

Şaxa Stenbolê ya Komelaya Mafên Mirovan(IHD) bi daxuyaniyeke çapemeniyê ragihandiye ku wan li şaxa xwe komisyona LGBTI+ ava kiriye. Her weha komeleyê destnîşan kiriye ku kesên rastî tacîz û mobînga laşî an jî dijîtal û binpêkirêna her cûre mafan hatine dikarin serî li komîsyonê bidin.

Komîsyona Jinan a Şaxa IHDya Amedê ji bo ku Aysel Tûglûk, Parlamentera HDPê ya berê û nexweşa demansê were azadkirin bang kiriye û gotiye ku bila Aysel Tûglûk û hemû girtiyên nexweş bên berdan.

Mehmet Hanefî Bîlgînê ku 30 sal in di girtîgehê de ye dilê wî sekiniye û miriye. Birayê wî Veysel Bîlgînî gotiye, “Em li benda berdana wî bûn, me cinazeya wî girt.”

Li gorî daneyên Weqfa Mafên Mirovan ya Tirkiyeyê di 4 salên dawî de 14 jê zarok 50 kes ji ber wesayîtên serbi saziyên dewletê û hêzên ewlekariyê li wan dane, birîndar bûne.

Li peravên Tûnûsê kelekek noqî avê bûye. Ji penaberên ku di kelekê de bûne jê 34 kes hatine rizgarkirin, 6 mirine. Her weha lêgerîna ji bo 30 kesên wenda ne didome.

Şaxa IHDyê ya Êlihê Rapora Binpêkirinên Mafên Mirovan ya sala 2021an aşkere kiriye. Li gorî raporê li tevahiya bajarê Êlihê di sala 2021an de 5 hezar û 19 bûyerên binpêkirinê qewimîn e. Ev jî tê wê wateyê her roj 14 bûyerên binpêkirinê qewimîn e. Îşkence li 35 kesan hatiye kirin. 474 kes hatine desteserkirin.

Li Cizîrê, navçeya Şirnexê ciwanê ku wesayîta zirxpoş ya cureya Rangerê lê dabû, miriye.

ÎHDa Stenbolê rapora xwe ya 3 mehan a têkildarî binpêkirina mafan li 20 girtîgehan belav kiriye. Li gorî raporê li girtîgehan tecrîd girantir bûye û 3 hezar û 118 bûyerên binpêkirinê qewimîne.

DMMEyê di sala 2021ê de derbarê Tirkiyeyê de 78 biryar aşkere kiriye. 76 jê, li dijî Tirkiyeyê bûn.

HDPyê di daxuyaniya xwe de wiha gotiye: hêzên ji bo êrîşê têk bibin ji Kobaniyê derketine rê, SIHAyan (Balafirên Bêmirov ên Biçek) êrîşî wan kiriye û ev jî tê wê wateyê ku piştgiriya asmanî dane DAIŞê.”