Hevberdevka Komîsyona Polîtîkayên Perwerdeyê ya HDPê Gulistan Kiliç Koçyîgîtê têkildarî sala nû ya perwerdeyê axivîye û wiha gotiye: “Perwerdehiya bi zimanê dayikê mafekî bingehîn e. Dersên bijarte cihê wê nagire.” Her weha li bajarên herêmê gelek sazî û rêxistinan têkildarî kurdî û sala nû ya perwerdeyê daxûyanî dane.

Komeleya Mafên Mirovan li ber avahiya Radyoya Stenbolê ya li Harbiyeyê daxuyanî daye û gotiye: "Em bang li wê hikûmeta ku dibêje ez li dijî darbeyan im dikin û dibêjin dijayetiya xwe ya 12ê Îlonê û derbeyan ispat bike."

Li gorî daneyên ku TUÎKê weşandine, di meha Tîrmehê de hejmara bêkaran 113 hezar kes kêm bûye. Lê bi giştî hejmara bêkaran zêde bûye. Li gorî heman daneyan, hejmara kesên kar dikin jî 148 hezar kêm bûye.

Parlamentera HDPê ya berê Gulser Yildirim ku zêdetirî 5 sal û 10 meh in di girtîgehê de ye, 3 meh berê cezayê ku lê hatibû birîn temam bûye lê nayê tehliyekirin.

Li navçeya Cîdeya Kastamonuyê bi çekan êrişî karkerên Kurd kirine. Di encama êrişê de karkerek miriye û yek jî birîndar bûye.

OHDê diyar kiriye ku girtîgeh kirine weke navendên îşkenceyê û xwestiye ku girtiyên nexweş ên mafên jiyana wan hatiye binpêkirin, bên berdan.

Hevseroka Giştî ya berê ya HDPyê Fîgen Yuksekdagê gotiye ku Aysel Tûglûk şandine nexweşxaneyê.

ÎHDa Mêrdînê raporek têkildarî kuştina Adem Karayî amade kiriye û di raporê de hatiye destnîşankirin ku di kêliya Kara hê birîndar bûye, polîsek ji sûcê “birîndarkirinê” derxistine dadgehê û dadgehê ew serbest berdaye.

Malbata Şenyaşar ku Nobeta xwe ya Edaletê didomîne bang li Wezareta Dadê kiriye û gotiye: “Li Rihayê edalet tenê wek peyv heye. Hûn ê bi kirinên xwe bên bibîranîn.”

Biroya Hiqûqê ya Sedsalê serî li CPTyê daye û xwestine ku bi lez û bez şandeyek biçe Girtîgeha Îmraliyê û hevdîtinê bi Ocalan, Yildirim, Konar û Aktaşî re bikin.

Hişyar Ozsoy, Parlamenterê Amedê yê HDPê gotiye: “Em rewşa Aysel Tûglûkê dizanin. Tevî ku raporên heyete hene jî bi mebesta tolhildanê Tûglûk li girtîgehê tê girtin.”

Makbûle Ozer (80) ku di 9ê Gulanê de bi îdiaya ku “alîkariya rêxistinê kiriye” li navçeya Artemêtan a Wanê hatibû girtin. Ozerê serbest bûye.

Daxwaza girtinê ya polîsê bi navê A.E. ku li Sûra Amedê ji sûcê "bi zanebûn" Hêlîn Hasret Şena ya 12 salî kuştiye dihat darizandin, nehatiye qebûlkirin.

Weke her sal, îsal jî wê civîna 14an a xelatdayînê ya Hrant Dînkî ya Navnetewî wê di 15ê Îlonê de ango roja jidayikbûna Hrant Dînkî pêk bê.

Komîsyona li Dijî Nîjadperestî û Cidakariyê ya IHDyê gotiye: “Xalek heye ku zêde li ser nayê sekinîn, ew jî beşdarbûna gel e. Gotina ku dibêje komeke rêveberan sûc kiriye dilê mirovan rehet dike, lê dema behsa beşdarbûna gel tê kirin ev mirovan aciz dike.”

Malbat di saetên serê sibê de ji mala xwe ya li navçeya Pirsûsa Rihayê çûye ber Edliyeya Rihayê û dest bi nobetê kiriye.

Mehmet Emîn Ozkan, girtiyê ku nexweşiya wî girane û 83 salî ye ji ber ku tenduristi-ya xerap bûye roja înê birine nexweşxaneyê.

Rojnamegerê girtî Ziya Ataman diyar kiriye ku dema ew birine Girtîgeha Dûmlû ya Erziromê ya bi Hejmar 2 lêgerîna tazî lê kirine û ew xistine hucreyeke yek kesî.

Engîn Korcûmê ku li Girtîgeha Tîpa Tya Xarpêtê dihat ragirtin, hatiye îddiakirin ku xwe kuştî ye. Walîtiya Dêrsimê destûr nedaye ku cinazeya wî bikeve Dêrsimê.

Rojnamegerên ku alavên wan hatine şikandin, derbkirin û gefa kuştinê li wan hatine xwarin, wê serî Şaxa Wanê ya Komeleya Mafê Mirovan (ÎHD) bidin û giliyê polîsan bikin.