Walîtiya Colemêrgê heta 15 rojan hemû çalakî qedexe kirine

Fotograf: AM

Li Colemêrgê heta 15 rojan hemû cure çalakî û bername hatine qedexekirin.

Walîtiya Colemêrgê di daxuyaniyekê de aşkere kiriye ku heta 15 rojan li navenda bajêr hemû çalakî hatine qedexekirin.

Walîtiya Colemêrgê di daxuyaniyê de wiha gotiye: “Ji bo rêgirtina li tawanan, parastina maf û azadiyên kesên din û belavbûna vîrûsa Coronayê” qedexe hatiye ragihandin.

Di daxuyaniyê da Walîtiye gotiye, bi biryara Meclisa Parastina Tenduristiya Parêzgehê di çarçoveya Madeya 19emîn a Qanûna Jimare 2911ê ya Civîn û Meşên Xwepêşandanê û herwiha Madeya 11emîn a Qanûna Birêvabirina Parêzgehan a Jimare 5442ê de ji bilî çalakiyên Walîtî û Qaymeqamtî destûrê bidin û yên dem û dezgehên dewletê, hemû çalakî û bernameyên din hatine qedexekirin. 

Li gor daxuyaniya Walîtiya Colemêrgê, li meydan, sikak, kolan, park û cihên giştî hemû çalakiyên wek mitîng, civînên li cihên vekirî, meş, çalakiyên rûniştinê, protesto, grevên birçîbûnê, vedana konan û standan, civînên çapemeniyê, konser, şahî, belavkirina belavokan û hemû çalakiyên wiha hatine qedexekirin. Qedexe ji roja 17ê Kanûna Pêşiyê ya 2020an di saet 00:01ê de destpê kiriye û wê heta 31ê heman mehê saet 23:59ê berdewam bike.(AY)