Tara Mamedovayê straneke nû weşandiye: Sîno 

Tara Mamedovayê straneke nû bi navê "Sîno" weşandiye. Mamedova yek ji wan stranbêjan e ku gotin û muzîka gelek stranên xwe bi xwe çêdike.

Sîno jî yek ji van stranan e.

Bi gotina Mamedovayê ev stran "straneke feminîstane" ye û çîroka wê jî wiha ye:

"Rojekê hunermend Tara Mamedova  li hevaleke xwe digere ji bona ku kêf û halê wê bipirse. Lê hevala wê dengê wê nizim û kelogirî bûye. Destgirtîyê wê ew gelek êşandîye û wê dev jê berdaye û xwestîye ji dil jê xilas bibe û behsa çîroka xwe kir. Hişmendîya paşverû di her warê jîyanê de tim dixwaze enerjî, reşka çavan, hêvî, serxwebûnî, azadîya jinan wek benîşt di devên xwe de biçû û bê qîmet bike. Di vê jîyanê de nabe ku ev bûyer normal bên dîtin, divê bi her awayî em bînin ziman. Bi gotin û mûzîkeke sivik, di nav de çend gotinên pêşîyan ên kal û bavan hunermendê hestên xwe nivîsî û kir stran."

Zelal Gokçe, Hîvda Gokel û Kivilcim Yilmazê jî bi dengên xwe di stranê de tevî Mamedovayê bûne.

Stran li ser hemû platformên dijîtal hatiye weşandin û îro wê klîba wê jî biweşe.

Di metna daxuyaniyê de ya ku ji bo çapemeniyê hatiye amadekirin, bi van gotinan behsa fikra klîbê hatiye kirin:

"Dinya weke ku ketîye nava bîreke bêserûber şer, kuştina jinan, feqîrî, koçberî, krîzên aborîyê krîzên ekolojîyê, hişmendîya paşverû ku her roj dibe sedema kûştina hêvîyên  mirovan. Em hesreta hêvîyeke biçûk in ku me ew dît em  wê dişopînin û bernadin. Di vê serdema ku bi hêvî û xeyalên me tê lîstin, divê ku em bêtir xwe bispêrin xwe û hewl bidin terekî hestên xwe bînin ziman, bêjin û bidin bihîstin. Me ji we re çîrokeke weha amade kir. Bi klîbeke têr rengîn û şên ku em bi mehan li ser xebitîn me xwest bi awayek û zimanekî cuda ramanên xwe bînin pêşberî we. Em dixwazın ji we, ji guhdarên xwe yên ezîz û hêja bibihîsin, gelo me karî em hestên xwe bi zimanê ku me hilbijartîye vebêjin? Derhênerîya klîbê Melodi Tözümê kir."

(FD)