Şanoya Bajêr a Amedê wê vê carê bi lîstika “Don Kîşotî” derkeve ser dikê
Fotograf: Şanoya Bajêr a Amedê
Şanoya Bajêr a Amedê piştî ku tedbîrên pandemiyê rabûn, amadekariyê dike ku şanoya bi navê “Don Kîşot” bilîze.
Endamên komê nêzîkî 3 meh in ku li ser vê lîstikê kar dikin û li gorî plansaziya wan lîstik wê 29ê Hezîranê cara pêşiyê li Amedê were lîstin.
Ozcan Ateş, yek ji lîstikvanên Şanoya Bajêr a Amedê, ji Fahrettin Kiliç û Eylem Akdag, nûçegîhanên Ajansa Mezopotamya re axivî ye û wiha behsa pêvajoya amadekirina lîstikê kiriye:
“Beriya pênç salan jî me xwestibû lîstika Don Kîşot bilîzin lê ji ber şert û mercan me nikaribû em bilîzin. Wê demê jî derhenêrê lîstikê Ferhad Feqî bû. Ferhad Feqî li Elmanyayê dijî û karê şanoyê dike. Don Kîşot fikra wî bû. Piştî 5 salan li ser xebitî, hin sahne ji romana Cervantesî derxist û ji wan şanonameyek çêkir. Pişt re li me geriya û got ‘ez dixwazim em bi hev re vê lîstika Don Kîşot bilîzin’. Me jî weke Şanoya Bajêr a Amedê biryar da ku em bilîzin. Niha em xebatên wê didomînin. Qasî 2-3 meh in em li ser dixebitin. Niha li ber haziriyê ye. Em ê di 29 û 30ê Hezîranê de promiyera wê çêbikin û derkevin pêş temaşevanan.”
Lîstik piştî du caran li Amedê were lîstin wê koma şanoyê bi qasî mehekê navberekê bidinê û paşê jî wê weke lîstika demsala nû ya şanoyan dîsa vê lîstikê bilîzin.
Ferhad Feqî di heman demê de derhênerê lîstikê ye ku Dilawer Zeraqî wergera metnê kiriye.
Lîstikvanên Şanoya Bajêr Ozcan Ateş, Şahabettîn Dag, Berfîn Emektar, Dîcle Guneş Yavûz, Ozkan Şeker û Şîlan Alagoz wê di lîstikê de dileyîzin. Wê lîstik sibê derkeve ser dika Şanoya Bajêr a Amedê û promiyera wê ya were pêşandan.
Ateşî diyar kiriye ku ji ber van sedeman wan xwestiye Don Kîşot, romana navdar a Miguel De Cervantesî bikin şano: “Don Kîşot çîrokên şovalyeyan dixwîne û derdikeve rêyekê, dixwaze bindestan û mazlûman biparêze. Li hemberî kesên ku zilmê dikin, dixwaze li cem yên bindest bisekine û wan biparêze. Armanca me ya lîstikê nîşandana rastiyekê ye. Em di lîstikê de rastiyê û nerastiyê bi hev re didin nîşandan.”
Berfîn Emektar, yek ji lîstîkvanên şanoyê jî ji bianetê re diyar kir ku, her çend wan li gor metna Cervantesî şano amade kiribe jî, wan li gorî şert û mercên îro adaptasyon kiriye. Emektarî got ku ji cil û bergan bigire heta forma şanoyê, wan tiştên cida ceribandine ku tê de wê dengbêjî û hin tiştên din hebin.
Dixwazin li bajarên din jî bilîzin
Li gorî zanyariyên ku Ateşî dane, piştî lîstik li Amedê lîstin, ew dixwazin li Stenbol, Enqere, Îzmîr, Edene, Mêrsîn û heke bibe li Ewropayê jî bilîzin.
Li gel vê lîstikê Şanoya Bajêr a. Amedê ji bo demsala nû ya şanoyan dixebite lê hê navê lîstikê diyar nekirine. Şanogar Ozcan Ateşî gotiye ku ew dixwazin lîstikeke zarokan amade bikin.
Şanoya Bajêr a Amedê, salon û sehneya xwe li gorî şert û mercên tedbîrên pandemiyê amade kiriye û Ateşî bang li temaşevanan kiriye ku biçin li şanoyên wan temaşe bikin. (FD)