Kevirên Sûrên Amedê têne dizîn

Li parêzgeha Amedê diyardeya jêkirin û firotina kevirên Sûra Amedê derketiye ‎holê. Xelkê Amedê nîgeran in û di wê baweriyê de ne ku eger rê li ber vê diyardeyê neyê girtin, wê ‎demê dê wêrankariyeke mezin li pey bê.

Li gor nûçeya Mehdî Mutluyî ya li Rûdawê hatî weşandin, kevirên 5 hezar salî yên Sûra Amedê ku remzên şaristaniyên dîrokî lê neqşandî ne ji aliyê kesên nediyar ve têne jêkirin û li bazaran bi buhayeke erzan têne firotin.

Sûra Amedê tevî ku di Lîsteya Daîmî ya Kelepûrên UNESCOyê de ye, bûye armanca ‎talankirinê û ji aliyê kesên nenaskirî ve kevirên wê bi şev tên dizîn.

Akademîsyen, Azîz Yagan dibêje, rûxandina Sûra Amedê di van demên dawiyê ne rûxandinekî asayî û xwezayî ye û diyar dike: “Weke ku hûn jî dibînin ev rûxandineke ne xwezayî ye, bi awayeke aşkere xûya dike ku kevirên dîrokî ji dîwarên Sûrê têne qutkirin û têne dizîn.”

Di pêvajoya şerê li 6 taxên Sûrê de wek sûrên Kelha Amedê 720 xaniyên ku ji aliyê Wezareta Jîngeh û Bajarsaziyê ve wek xaniyên dîrokî hatibûne pesendkirin, ji nav çûbûn, niha kevirên wan xaniyên dîrokî û Sûra Amedê li bazarekî qerexa çemê Dîcleyleyê bi awayekî ne yasayî têne firotin.

(MB)

*Çavkanî: Rûdaw