Hejmara 25an a Kovara Dilopê derketiye

Hejmara 25an Kovara Dilopê derketiye. Di vê hejmara Gulan û Hezîranê de Dilopê, dosyayek derbarê têkoşîna çîna karkeran a li “Herêmê” amade kiriye.

Ev dosye bi sernavê “Têkoşîna Çînê ya li Herêmê” hatiye weşandin û nivîsa Recep Maraşliyî ya bi navê “Ji Grevên Batman Petrolê heta Xwenîşandanên Rojhilatê” di vê dosyayê de cih girtiye.

Maraşliyî greva ku di sala 1967an de li Êlihê, karkerên li Parzûngeha Petrolê ya Êlihê kar dikirin û “Xwenîşandên Rojhilatê” yên ji sala 1967an heta 1970î dewam kiriye, di nivîsê de nirxandiye.

Di dosyeyê de her weha hevpeyvîneke ku Mehmet Turkmen û Arîf Nacaroglûyî li ser grevên karkeran ên li Dîlok û Rihayê bûne kiriye, heye. Turkmen û Nacaroglûyî derbarê tecrubeya karkerên tekstîlê yên li van herdu bajaran de axivîne. Herdu nivîsên dosyeyê jî bi tirkî ne.

Di hejmara 25an a Kovara Dilopê de Sezaî Sarioglûyî bi tirkî behsa Migirdiç Margosyanî kiriye. Nivîsa Rohat Alakomî ya derbarê “Reşîdê Kurd” de ji kurdî wergerandine tirkî û nivîsa Sîbel Ozê ya bi navê “Tenê Jiyan Bûye” jî ji tirkî wergerandine kurdî û weşandine.

Çîroka “Veger” a Mizgîn Ronakê, nivîsa “Dîroka Mêrdînê” ya Mesût Alpî, nivîsa “Jiyan û şîroveya Evdalê Zeynikê” ya Feyzî Mîrhesenî çend nivîsên din ên bi kurdî ne.

Reşo Ronahiyî derbarê fotografgeriyê de hevpeyvînek bi Mem Artemêtî re kiriye. Cemîl Ogûzî bi kurdî û Veysî Altayî jî bi tirkî behsa Festîvala Fîlmên Kurdî ya Stenbolê kirine.

Her weha helbesteke Hakob Hakobyanî ya Heciyê Cindî ji ermenkî wergerandiye kurmanciyê, helbesteke Emîralî Yaganî, yeke Muslum Aslanî, yeke Leyla Mexso Beraziyê jî di vê hejmarê de cih girtine.

Hevpevyîna bi Lale Yalçin Heckmannê, nivîsa Akin Yanardagî û ya Elîf Eserê yên din in ku di kovarê de çap bûne. (FD)