HDPyê û partiyên Kurdistanî banga beşdariya Newrozê kirine

Fotograf: HDP

Bi beşdariya Hevserokên Giştî yên HDP'ê Pervîn Bûldan û Mîthat Sancarî li navçeya Sûrê, bi civîneke çapameniye bernameya pîrozbahiya Newrozê hatiye aşkerekirin.

Li Amedê bi beşdariya hevserok, hevberdevk û nunerên partî û tevgerên kurdan bernameya pîrozbahiya Newroza 2020an a Amedê bi civînek çapemeniyê hatiye aşkerekirin.

Hevserokên Kongreya Civaka Demokratîk (KCD) Leyla Guven û Berdan Ozturk, Hevserokên Partiya Herêmên Demokratîk (DBP) Salîha Aydenîz û Keskîn Bayindir, Hevserokên Giştî yên Partiya Demokratîk a Gelan (HDP) Pervîn Bûldan û Mîthat Sancar, Hevberdevkên Kongreya Demokratîk a Gelan (HDK) Îdîl Ûgûrlû û Sedat Şenoglû, Berdevka Tevgera Jinên Azad (TJA) Ayşe Gokkan, Serokê Giştî yê Partiya Azadî Ayetûllah Aştî, nûnerên Komeleya Şoreşgerên Demokratîk a Kurd (DDKD), Serokê Giştî yê Partiya Însan û Azadî (PÎA) Mehmet Kamaç, Serokê Giştî yê Partîya Komunîst a Kurdistan (KKP) Sînan Çîftyurek, Nûnerê Platforma Demokratên Kurdistanê (PDK-Bakûr) Bora Balîn û parlamenterên HDPyê beşdarî civînê bûne.

Civîn li Otêla Demîr a navçeya Sûrê ya Amedê pêk hatiye metna ku hatibû amadekirin bi kurdî û tirkî hatiye xwendin. Serokê Giştî yê PÎAyê Mehmet Kamaçî metna bi kurdî, Hevserokê KCDyê Berdan Ozturkî jî ya bi tirkî xwendiye.

Banga beşdariya Newrozê hatiye kirin

Beşek ji metna ku hatiye amadekirin wiha ye:

"Em îsal jî di bin siya şer, xizanî û bêçareseriyê de Newrozê pîroz dikin. Bi ruhê Newroza ku li hemberî zilma dîrokî û redkirina newekheviyê vejiyaye, îro jî li dijî şer, bêedaletî û polîtîkayên înkarkirinê gotina me heye.

Di Newroza ku dê bi mîlyonan kes dakevin qadan de;

Em dê nîşan bidin ku daxwazên siyasî yên gelê Kurd ne mijara bazariyê ya hêzên şer e. Ji bo avakirina jiyana di nava aşitiyek bi rûmet, wekhev û azad em dê hemû qadên jiyanê bi rêxistin bikin. Em dê jiyana axatî û koletiyê ya ku li ser me tê ferzkirin teqez qebûl nekin. Bi vê munasebetê em ê banga piştevaniyê li tevahî Raya Giştî ya Navnetewî û dostên xwe bikin.

Ji bo aşitiya Rojhilata Navîn em dê bang li tevahî gelên cîhanê bikin ku li hemberî şerên hegomon ên tê kûrkirin dengê xwe bilind bikin. Em ê ji bo neheqî û bêhiqûqiyên li hemberî girtiyên dîl hatine girtin, brêz Abdullah Ocalan ê ku 21 sale di bin tecrîda giran de ye, girtiyên nexweş û hemû girtiyên siyasî azadiyê biqêrin.

Em dê jin, ciwan û kalepîr ji bo daxwazên jinan ên azadî û jiyana hevpar ku bi berxwedana xwe hêz dane me û berxwedanê nîşanî me dane biqêrin.

Li hemberî sermiyedarkirina av, çem, daristan û bajarên xwe, em dê li dijî hilweşandina dorhêl û texrîbatên li xwezaya ku ji qadên me yên jiyanê pêk tên bêjin raweste.

Em dê daxwaza xwe ya; cîhana ku tê de mirov ji birçîna întixar nakin, ji bo hûnandina jiyana wekhev û mirovî ku tê de mêtingerî tunebe biqêrin.

Em dê di serî de daxwaza rakirina astengiyên li pêş siyaseta demokratîk, rêveberiyek wekhev, azad û adilane biqirin.

Dê Newroza 2020'an bibe platforma ku, gelê Kurd tê de bi coş û kelecanek mezin daxwazên xwe yên siyasî biqêre. Em di serî de gelê xwe, hemû dostên xwe, rêxistinên saziyên sivîl, jin, ciwan û rêxistinên xweza û dorhêlparêzan dawetî pîrozbahiya Newroza 2020'an dikin." (FD)

* Çavkanî: MA