"Duh em li ser rêyan qetil dikirin, îro me digirin û dişînin girtîgehê"

Fotograf: Semra Yansît / bianet

Piştî ku 16 rojnameger bi biryara heyeta dadgehê hate girtin, Komeleya Rojnamegeran a Dîcle û Firatê (DFG) ji bo girtina 16 rojnamegeran çalakiyek li dar xist.

Çalakî li navçeya Yenîşehîr a Amedê, li ber avahiya DFGyê ya li taxa Ofîsê pêk hat. Nûnerên Partîya Dêmokratik a Gelan (HDP), Partîya Herêmên Demokratîk (DBP), Komeleya Lêkolînên Çand û Hunerê ya Mezopotamyayê (MED-DER), Dayîken Aştiyê û Komeleya Çand, Yekîtî, Piştevanî û Alîkariya Malbatên ku Xizmên xwe li Dergûşa Şariştaniyê Winda Kirine (MEBYA-DER) tevli daxuyaniyê bûn. Di daxuyanî de pankartek hate vekirin ku fotografên rojnamegerên girtî û nivîsa bi tirkî "Susturamayacaksınız" (Hûn nikarin bêdeng bikin) li ser hebû.

Bixwîne - 16 rojnameger hatine girtin

Edîtorê Ajansa Mezopotamyayê Fexredîn Kiliçî di destpêka çalakiyê de axivî û anî ziman ku 16 rojnameger bi awayekî dijhiqûqî hatin girtin û bi van gotinan dewam kiriye: "Lê bila baş be famkirin ku kevnoşopiya çapameniye azad ne bi binçavkirinê, ne bi girtinê û ne jî bi qetilkirinê bi dawî nabe."

Hevseroka DFGê Dîcle Muftuoglûyê metna daxuyaniyê xwend. Muftuoglûyê diyar kir ku di girtîgehe de 60 rojnameger hebûn û bi girtina 16 hevalên wan re, ev hejmar bûye 76 kes: "Kevneşopiya çapemeniya azad ji salên 1990î û vir ve hewl dide rastiyê bigihîne raya giştî. 

"Roj hat hempîşeyên me hatin qetilkirin, ajansên wan hatin bombebarankirin, roj hat deriyên wan hatin mohrkirin. Belê reng û şêweyê êrişan hat guhertin lê belê eslê wan nehate guhertin. Yên ku duh em li ser rêyan qetil dikirin, îro me digirin û dişînin girtîgehê. Em baş dizanin bi doz û biryaran pîşeya me tê tewanbarkirin. Dixwazin karê me krîmînalîze bikin. Bê tehmiliya wan ya li hemberî me eşkere bû. Girtina hempîşeyên me ji bo hinekan kirin xelat.”

"Pergala desthilatdariyê edaleta copy-paste e"

Muftuoglu di dewama axaftina xwe de anî ziman ku pergala desthilatdariyê edaleta cop-paste e: "Sedema girtinê, encama bêtehamulî û nêzîkatiya antîdemokratîk e. Em dizanin ku ev operasyonên li dijî çapemeniya azad ji aliyê kê ve tên kirin, operasyonên ji nerêzê ne."

"Komîsyona Edaletê jî yasaya sansura çapemeniyê pejirand"

Muftuoglûyê behsa projeyasaya dezenformasyonê kir û diyar kir ke Erdogan ji xwe re Abdulhamîtî weke mînak qebûl dike: "Hikûmet bi bêdengkirina rojnamegeran dixwaze ji çirava ku ketiye derkeve. Di saeta ku hevalên me yên rojnameger hatin girtin de, 'zagona sansura çapemeniyê' li Meclîsê ji Komîsyona Edaletê derbas bû. Erdogan Abdulhamît wek referans digire û dixwaze tirsê li her derê belav bike. Dixwazin tenê saziyên wan ên ragihandinê ragihînin. Bi her awayî em ê têkoşîna xwe ya ji bo heqîqetê li dijî vê fermana derew û zîhniyeta qirêj bidomînin."

Rojnameger paşê çalakiya rûniştinê pêk anîn û di dawiyê de sloganên mîna "Hûn nikarin çapameniya azad bêdeng bikin", "Bijî berxwedan" berz kirin.