“Don Kîxot”ê li Kocaeliyê hate qedexekirin duh li Stenbolê bû

Lîstika şanoyê ya “Don Kîxotî” ya Şanoya Bajêr a Amedê, duh li Stenbolê hate nişandan. Şanogerên Şanoya Bajêr a Amedê, duh bi şev li Kadikoyê, li Navenda Çandê ya Kozyatagiyê lîstik pêşkêş kirin.

Bixwîne - Şaredariyeke din a AKPyê vê carê jî destûra şanoya kurdî nedaye

Lîstik, ji ber pirtûka Cervantesî ya bi heman navî hatiye girtin. Di lîstikê de karakterê sereke Alonso Quijano ango Don Kîxot e ku jiyana wî di Serdema Navîn de derbas dibe. Ew bi xwe begzade ye û gelek pirtûkên li ser şovalyeyan xwendiye. Piştî demekê ketiye bin bandora van şovalyeyan û bi xwe dixwaze bibe şovalye. Piştî demekê gundiyê hejar û belengaz Sancho Panzayî dike alîkarê xwe. Herdu bi hev re derdikevin rê û mîna şovalyeyan tevdigerin.

Nivîskar Dilawer Zeraqî ev berhem ji bo kurdiyê wergerandiye û Ferhad Feqî derhêneriya wê kiriye. Di lîstîkê de li gorî adaptasyonê rengekî kurdewarî li lîstika orîjînal hatiye zêdekirin û di dema lîstikê de gelek biwêj û gotinên pêşiyan, stran û kilamên bi kurdî hatine bicihkirin.

Lîstikvan li gorî pêşdeçûna lîstikê car caran ji ser sahne ango dikê dadikevin û lîstikê di nava temaşevanan de dewam dikin.

Di lîstikê de Ozcan Ateş, Şahabettîn Dag, Berfîn Emektar, Elvan Koçerî, Ozkan Şeker û Şîlan Alagoz dilîzin.

Lîstika ku beriya niha bi demeke kurt, li Kocaeliyê Şaredariya Çayirovayê ya AKPyê nîşandana wê asteng kiribû wê îro li navçeya Kartalê û paşê jî wê li Ataşehîr, Esenyûrt û Avcilarê û herî dawî jî wê li Çanakkaleyê were nîşandan.

(FD)