Di xwepêşandanên Perûyê de hejmara kesên mirine derketiye 26an

Ji bo nûçeya tirkî bitikîne

Li Perûyê piştî ku di 7ê Kanûna Pêşiyê de Serokomar Pedro Castîllo ji wezîfeyê hat girtin û şandin girtîgehê xwepêşandanan destpê kiribû. Di wan xwepêşandanan de hejmara kesên mirine derketiye 26an.

Bi hezaran xwepêşander li gelek bajarên wî welatî daketine kolanan û daxwaza îstifakirina Serokomara nû Dîna Boluarte, alîkara berê ya Castillo kirine û daxwaza serbestberdana Castilloyî desteserkirî kirine.

Wezareta Tenduristiyê ya Perûyê ragihandiye ku hejmara kesên di xwepêşandanan de jiyana xwe ji dest dane derketiye 26an û 61 kes jî li nexweşxaneyan tên dermankirin.

Li gorî rojnameya New York Tîmesê Rêxistina Efûyê ya Navneteweyî jî di nav de gelek rêxistinên maf polîs û hêzên çekdar ên Peruyê tawanbar dikin ku li dijî xwepêşanderan hêza zêde bikartîne.

Li gorî daxuyaniya Ofîsa Çavdêriya Giştî ya Perûyê, heta niha herî kêm 356 sivîl û 290 polîs ji ber xwepêşandanan birîndar bûne. Di 16ê Kanûna Pêşiyê de tenê li bajarê Ayacucho di navbera xwepêşander û leşkeran de pevçûn derketibûn û 9 kes hatibûn kuştin ku di nav wan de zarokekî 15 salî jî hebûye.(SD/AY)