Serlêdanên Pêşbirka Helbestan a Arjen Ariyî dest pê kir

Fotograf: Murat Bayram / bianet

Serlêdanên ji bo 7emîn Pêşbirka Helbestan a Arjen Arî dest pê kir. Pêşbirk ji hêla Weşanên Sor û malbata Arjen Ariyî ve ji bo bîranîna yek ji nûnerên Wêjeya Modern a Kurdî Helbestvan Arjen Ariyê ve li dar dikeve.

Bixwîne - Weşanên Sorê hemû helbestên Arjen Ariyî weşandiye

Li gorî nûçeya Ajansa Mezopotamyayê, Nûnerê Weşanên Sorê yê Amedê Reşo Ronahî derbarê pêşbirkê de li Şaxa Amedê ya Sendîkaya Egîtîm-Senê Hejmar 1ê civîneke çapemeniyê li dar xistiye. Ronahiyî şertên pêşbirkê aşkere kiriye û gotiye ku ew “bi armanca xwedîderketina li wêje û zimanê kurdî li dar dixin ku Arjen Ariyî kedeke mezin dayê.” 

Berhema biserkeve wê bibe pirtûk 

Juriya pêşbirkê ji Berken Bereh, Necla Arî (Xwişka Arjen Arî), Bêrîvan Zînzal, Fewzî Bîlge û Yeqîn H. pêk tê û serlêdanên pêşbirkê di navbera 26ê Çiriya Paşîn a 2019an û 1ê Adara 2020an de wê bên qebûlkirin. 

Şertên pêşbirkê bi tevahî wiha ne: 

 * Xelat dê bo berhemên bi zaravayê kurmancî hatiye nivîsandin bê dayîn.

* Weşanên Sorê wê berhema ku di encama pêşbirkê de bi ser bikeve weke pirtûk çap bike. Ev wê weke xelata pêşbirkê be.

*Her kesê/a ku heta niha berhemeke wî/wê ya helbestê nehatibe çapkirin dikare serî lê bide.

*Malbata Arjen Ariyî û Weşanên Sorê dê bi hev re kesekî/ê ku ji bo parastin û pêşvebirina ziman û edebiyata kurdî kar û xebat kiriye hilbijêrin û “xelata rûmetê” bidinê.      

*Berhemên ji hêla saziyekê ve hatibe xelatkirin an di pêşbirkekê de xelat wergirtibe nikare tevlî pêşbirkê bibe.

*Berhemên ku tevli pêşbirkê bibin divê bi alfabeya latînî hatibin nivîsandin.

*Mafê lijneyê heye ku di dema çapkirinê de li ser berhema xelat wergirtiye guhertinan bike.

 *Heke jurî ti dosyeyê hêjayî xelatê nebîne dikare xelatê nede.

 *Dosyeyên ku ji bo pêşbirkê bêne rêkirin divê di hecma pirtûkê de, 64 rûpel (4 form) bin. 

 *Dosye divê di formata A4 de, 5(pênc)nusxe û bi CDyek, USByek ku dosye tê de ye bê rêkirin ango bi awayê maîlê bê şandin. 

 *Dosyeyên ku bi kompûterê nehatine nivîsandin û CDyek, USByek pêve nekirî ango bi mailê nehatine şandin wê neyên nirxandin.

 *Divê di dosyeyê de nav, nîşan an mexlas hwd. ku xwediyê berhemê bide nasîn tunebe. 

 *Helbestvanên ku beşdarî pêşbirkê bibin dê kurtejiyan, navnîşan û pêdiviyên bo têkiliyê di nav zerfeke devgirtî de rêbikin. 

 *Encama pêşbirkê dê di 15ê Gulana 2020an de, yanê roja cejna zimanê kurdî bê aşkerekirin û xelat jî dê sala bê di Fûara Pirtûkan a Amedê de bê dayîn.

*Divê dosye bi kargo yan bi posteyê, bo vê adresê bêne rêkirin: Yenişehir Mah., Ali Emiri 7. Sokak, No:22/7, Kat:1, Yenişehir/Diyarbakır (li ser navê Buroya Amedê ya Rojnameya Evrenselê)

*Serlêdanên rû bi rû nayên qebûlkirin. 

*Dosyeyên ku bo pêşbirkê bêne rêkirin li xwediyê wan nayêne vegerandin.

*Endamên lijneya pêşbirka helbestê ya Arjen Arî, dê piştî encamê bizanin ka xwediyê berhemên ku dengê xwe dane wan kî ne. (FD)