Îro, 23yê Kanûna Pêşiyê, rojnameyeke nû li rojnamegeriya kurdî zêde bû. Navê rojnameyê Xwebûn e. Rojname wê bi kurmancî û kirmanckî weşanê bike. Rojnamegerên ku rojnameya Xwebûnê amade dikin û digihînin ber destê xwendevanan, di danasîna rojnameyê de Xwebûn wiha penase kirine:
“Xwebûn, xwenasîn û xwezanîn e. Di felsefeyê de xwenasîn bingeha hemû zanebûnan e. Em xwebûna xwe di ziman, çand, erdnîgarî û azadiyê de dibînin. Îro hebûn û zimanê me desteser kirine û wekî çek li hemberî me bi kar tînin.”
Wek rojnameya Xwebûn bêguman çend rêgezên me
— Xwebûn (@RojnameyaXwebun) December 22, 2019
yên weşanê hene. Ya yekemîn li hemberî pişaftinê parastina zimanê kurdî ye. Rêgezeke din a bingehîn
agahdarkirina rast a civakê ye. Her wiha yekitiya neteweyî
ku niha di rojeva kurdan de ji bo me jî rêgezeke din e.
Selîm Temo, Yildiz Çakar, Ayhan Erkmen, Samî Tan, Mizgîn Ronak, Şener Ozmen, Agît Yazar, Felemez Ulug, Ramazan Olçen û Wisif Zozanî nivîskarên rojnameyê ne.
Dîsa lijneyek jî hatiye avakirin, ji bo şêwirmendiyê ji weşanê re bikin. Lijne ji van kesan pêk hatiye: Abdulla Peşêw, Ehmed Huseynî, Kakşar Oremar, Prof. Knyaz Îbrahîm Mîrzoyev, Selîm Temo û Dr. Zerdeş Haco.
Rojname wê heftane be û bêhtir cih bide nivîs, nûçe û analîzên li ser ziman, çand, huner û wêjeya kurdî.
"Em dikarin di rojên pêş de bikin rojane"
Elifcan Alkan, yek ji edîtora rojnameyê ye. Alkanê ji bianetê re behsa bi van gotinan behsa rojnameyê kir: “Em dixwazin di vê rojnameyê de li ser çand û huner û zimanê kurdî bisekinin. Ji ber wê me got bila heftane be. Ji ber şert û mercên niha jî me biryareke wiha de. Di pêşerojê de li gorî daxwazê em dikarin vegerînin rojane. Hin pirsgirêkên matbaayê û hin pirsgirêkên din jî hene. Bandora van tiştan jî hene.”
Alkanê armanca weşanê ya rojnameya Xwebûnê bi van gotinan anî ziman: “Armanca me ya yekemîn ew e ku dema nûçe bê çêkirin xwerû kurdî be. Ne ku ji zimanekî din wergerê bikin. Em dikarin ji zimanekî din agahiyan bistînin lê divê nûçeyên me xwerû kurdî bin. Ji ber polîtikayên asîmilasyonê jiyan herî zêde bi tirkî ye. Tu bixwazî nexwazî dema tu vedigerî kurdî jî ji ber ku çavkaniyekî kurdî nîne, wê gavê jî ji tirkî wergerê dike. Di encamê de jî ruh namîne. Em hewl didin ku firk û raman bi kurdî be. Ne werger be. Kesê ku dinivîsin bi kurdî bifikirin û bi kurdî binivîsin.”
"Mîzanpaj û naverok li gorî rexneyan dibe biguhere"
Mîzanpaj û naveroka rojnameyê, rojnameya Azadiya Welatê bibîr tîne. Elifcan Alkanê derbarê vê mijarê de diyar kir ku mîzanpaj wê di nava demê de li gorî nêrîn, rexne û daxwaza xwendevanan biguhere.
Xwebûn kêm be jî wê di nava rûpelên xwe nivîs û analîzên siyasî jî biweşîne. (FD)
