Ladino, Judeo-Espanyol O Yahudidje

El Judeo-Espanyol era la lingua maternal de los Judios del Imperio Otomano i de la Republika Turka asta los anyos 1970. Estos Judios otomanos aviyan venido de la Espanya en 1492 i durante las dekadas sigientes, porke la Inkizisyon espanyola no keriya a elementos judios o muzulmanos en su pais. Los Judios toparon refujyo en el Imperio i se instalaron en el oeste de Anatolia, Trakya i los Balkanes. Durante kaji 500 anyos avlaron la lingua ke trusheron de la Espanya, una meskla de dialektos de la peninsula Iberika de la Edad Media. Esta lingua, komo se avlava solo por los Judios, vino a ser yamada en Turko "Yahudidje" o "lingua de Judios". Oy se yama mas akademikamente el "Judeo-Espanyol", kere dizir el Espanyol de la Edad Media ke tomo una identidad spesifikamente judia.

El Judeo-Espanyol ke funksionava komo lingua de kaza i de famiya asta los anyos '70 ya no se avla mas en las kazas judias de Turkiya. Oy, los mansevos no se pueden ambezar esta lingua de sus padres komo mo la ambezimos mozotros, la dalkavo jenerasion ke avla esta lingua, la jenerasion de los ke nasyeron entre 1940 i 1960. Oy, los dalkavos nativos de esta lingua nasyeron lo mas tadre en 1945 i kuando estas personas ya no estaran mas, ya no va aver nativos del Judeo-Espanyol.

La lingua Judeo-Espanyol no es un elemento abstrakto; eya detiene en si la erensia kultural, el karakter, el umor, el pensamiento de un puevlo: los Sefaradis del Imperio Otomano. Perder la lingua sera no solo un empovresimiento para los Sefaradis de la Turkiya, ma para la erensia kultural de la Turkiya tambien.

Karen Gerson Şarhon

Koordinadora del Sentro Sefardi de Estambol

www.istanbulsephardiccenter.com

http://sephardiccenter.wordpress.com

*Türkçesi için tıklayın.

* Click for English.