Samî Tan

Lêkolîner-Zimanzan. Li Rihayê xebatên xwe yên li ser zimanê kurdî di bin banê Komeleya Çand û Zimanê Kurdî de didomîne. Her wiha di Edessa Tv de li ser ziman, çand û wêjeya kurdî bernameya bi navê Deng û Reng pêşkêş dike.

Di tîrmeha1993yan de bi awayekî profesyonel di Rojnameya Welat de dest bi rojnamegerîya kurdî kiriye. Piştî girtina rojnameya Welat, di beşa nûçeyên cîhanê ya Rojnameya Ozgur Ulkeyê de xebitiye. Di rojnameyên Welatê Me û Azadîya Welat da wekî edîtor xebat kiriye. Ji sala 1997an heta 2005an wekî gerînendeyê giştî û sernivîser di rojnameya Azadiya Welat de xebat kiriye. Gotarên wî di gelek rojname û kovarên kurdî de hatine weşandin.

Di sala 2002yan da wekî serperiştê beşa kurdî û berpirsê karê nivîsaran ê Ajansa DÎHAyê kar kiriye. Ji sala 2007an heta 2016an wekî rêveber, serok û hevserok di Enstîtuya Kurdî ya Stenbolê de xebatên lêkolînî û akademîk pêk anîne. Di kovara Zendê da bi dehan gotarên wî yên lêkolînî hatine weşandin.

Tan derçûyê beşa Ziman û Wêjeya Farisî û Beşa Zimannasîyê ya Zanîngeha Stenbolê ye. Her wiha di 2018an da jî li Zanîngeha Artûklûyê di beşa Ziman û Çanda Kurdî da lîsansa bilind a bitez kuta kiriye.

Berhemên wî: Waneyên Rêzimanê Kurmancî (2000), Şer Giran e, Ne Karê Henekan e (Mîzah) (2003), Rêzimana Kurmancî (2015), Analîza Du Xebatên Destpêkî yên Rêzimana Kurmancî (2019) (Teza Lîsansa Bilind), Seta pirtûkên fêrkirina kurmancî: Hînker û Hînker Kurmancî (Tevî Ronayî Onen), Ferhenga Kurdî-Îngilîzî; English_Kurdish Dictionary (2022) (Tevî Aysel Çetîn), Her bijî empatî, her bijî sempatî (Mîzah) (2025) Ziman: Man û Neman (Gotarê der barê zimanê kurdîya kurmancî de) (2026).

Werger û edîtorî: Manîfestoya Partîya Komunîst, Kapîtal Manga, Pirtûka gotarên “Konferansa Zimanê Kurdî” (Amadekar).