Ji bo nûçeya tirkî bitikîne
Koma Lêkolînên Enflasyonê (ENAG) enflasyona meha Hezîranê û ya salê aşkere kiriye. Akademîsyen û ekonomîstan koma navborî ava kirine û li beramberî daxuyaniyên Saziya Îstatîstîkan a Tirkiyeyê (TUÎK) ew jî îstatîstîkên xwe yên derbarê enflasyonê de aşkere dikin.
Li gorî daxuyaniya ENAGê enflasyon di meha Hezîranê de ji sedî 8,31 zêde bûye. Enflasyona 6 mehan (Kanûna Paşiyê- Hezîran) jî bûye ji sedî 71,43.
TUÎKê jî îro daxuyaniyek weşandibû û gotibû ku enflasyona meha Hezîranê ji sedî 4,95 e, ya salê jî ji sedî 78,63 ye. Enflasyona salane ya ENAGê ji sedî 175 e.
Li gorî daneyên enagê di meha hezîranê de herî hindik bihayê xizmetguzariya tenduristiyê zêde bûye ku ji sedî 0,80 e. Herî zêde jî bihayê xanuyan û kelûpelên wan zêde bûne ku ew jî ji sedî 16,51 e. (HA/FD)
