CHPyê xwest ku mal û milkên Kiliçdaroglûyî werin lêkolînkirin

Ji bo nûçeya Tirkî / İngilîzî bitikîne

Serokê Giştî yê CHPyê Kemal Kiliçdaroglûyî demeke berê gotibû ku kurê Serokê Giştî yê AKPyê û Serokomar Recep Tayyîp Erdoganî, kesûkarên wî, zavayê wî û midûrê wî yê berê yê karên wî yên taybet pare şandine wê şîrketa off-shore ku li Girava Manê hatiye avakirin. Kiliçdaroglû duh di Parlamentoyê de axivîbû û xwestibû ku partiya wî derbarê wî, hevjîna wî û xizmên wî de lêkolîna mal û milkên wan bê kirin.

Kiliçdaroglû duh wiha axivîbû: “Ez li vir dibejim, ez ji parlamenterên CHPyê re dibêjim, ji bo malbata min, zarokên min, neviyên min, zavayê min, heta û heta ji bo kesûkarê min, ji bo hemû kesan pêşniyaznameya lêkolînê bidin û bila lêkolîn li ser hemûyan bê kirin.”

“Keça min xaniyek kiriye…”

Hatibû îdiakirin ku Zeynep Kiliçdaroglû keça Kemal Kiliçdaroglûyî ji Bûz Rezîdansê xaniyek kiriye ku Bûz Rezîdans ya Battal Îzgezdî Şaredarê navçeya Ataşehîr a Stenbolê ye.

Kiliçdaroglûyî ji parlamenterên CHPyê re gotibû; “Hin îdia derbarên min de anîn ziman. Keça min xaniyek kiriye. Ji bo zarokên min, zavayên min, keça min û heta û heta ji bo kesûkarê min pêşniyaznameya lêkolînê pêşniyaz bikin”.

Şaredarê CHPyî ji kar hatibû dûrxistin

Wezareta Karên Hundir bi hinceta ku li dijî Yasaya Avadaniyê û li hemberî Kanûna Têkoşîna bi Gendeliyê re û Kanûna Îhaleyên Dewletê derketiye Îlgezdî Şaredarê Ataşehîrê yê CHPyî ji kar dûr xistibû. Îlgezdî piştî biryarê gotibû ku “Hemû îdia bûbûn mijara dadgehê û dadgehê biryara beraetê dabû. Ti hesabê min nîne ku ez bidim, de kerem bikin werin!”

Kemal Kiliçdaroglûyî mal û milkên xwe di sala 2003, 2005, 2207, 2009 û 2010ê de bi raya giştî re par ve kiribû. Li gorî zanyariyên Kanûna Paşiyê ya 2010ê du xanî, eraseyek, sê parên kooperatîfan û 8 tabloyên ku buhayên wan 2 hezar û 733 lîre ne li ser Kiliçdaroglûyî qeydkirî ne. (PT/FD)