Enstîtuya Lazan, 7ê Çiriya Paşiyê weke Roja Zimanê Lazî pejirandiye

Enstîtuya Lazan, 7ê Çiriya Paşiyê weke Roja Zimanê Lazî pejirandiye. Li cîhanê her diçe hejmara kesên bi lazî dizanin û diaxivin, kêm dibe. Enstîtû armanc dike ku bi vî awayî lazî biparêze û balê bikişîne ser.

Stenbol

Ji bo nûçeya tirkî / ingilîzî bitikîne

Enstîtuya Lazan, 7ê Çiriya Paşiyê weke Roja Zimanê Lazî pejirandiye. Enstîtu ji bo parastin û pêşxistina ziman û çanda lazî di sala 2013an de ava bûbû. Li cîhanê her diçe hejmara kesên bi lazî dizanin û diaxivin, kêm dibe. Enstîtû armanc dike ku bi vî awayî lazî biparêze û balê bikişîne ser û wê li gorî vê armancê çalakiyan li dar bixin.

Enstîtuyê bi mebesta vê biryarê daxuyaniyeke nivîskî weşandiye. Enstîtuyê sedema ku 7ê Çiriya Paşiyê hilbijartina wiha diyar kirine:

“Xebatên xwedîlêderketina ziman û çanda lazî, li Tirkiyeyê di salên 1990î de destpê kirin. Yekem kovara çanda lazî, OGNI (bibihîz, fam bike) di Çiriya Paşiyê ya sala 1993yan de dest bi weşanê kir. Lê Îskender Tzîtaşî û hevalên xwe, gelek beriya vê, li Abhazya, komara ku li Yekîtiya Sovyetan xweser e, yekem rojnameya lazî Mç’ita Murutsxi (Stêrka Sor), di 7ê Çiriya Paşiyê ya 1929an de weşandine. Hemû weşana rojnameyê bi lazî bû û bi alfabeya latînî weşan dikir. Rojnameyê armanc dikir ku hejmara xwende û nivîsendeyên lazî zêde bibe û lazî bibe zimanê nivîsê.

Kazim Koyûncû

“Girîngiyeke din a 7ê Çiriya Paşiyê heye ku ew jî stranbêjê lazî, Kazim Koyûncu di vê rojê de jidayik bûye. Li Tirkiyeyê gelek keda Kazim Koyûncûyî ji bo nasandin û hezkirina lazî çêbûye û ciwanên laz gelekî jê hez dikin û ji bo wan kesekî nimûne ye. Ji ber van hemû taybetmendiyan, diyarkirin û pîrozkirina 7ê Çiriya Paşiyê ji bo Roja Zimanê Lazî, nîşaneya nirxekî ye.”

Yekem bername pêk hatiye

Yekem bernameya pîrozbahiyê ya Roja Zimanê Lazî, îsal di 7ê Çiriya Paşiyê de pêk hatiye. Bername bi rêya bernameya Zoomê li dar ketiye û gelek hunermend, nivîskar, helbestvan û çalakvan tevlî nûnerên Komeleya Piştevanî û Çanda Lazan, ji endamên Tora zimanên di Nav Xetereyê de ne, Komeleya Çanda Kafkasan a Stenbolê, Zaza-Der, Komeleya Xwedîlêderketin û Lêkolînê ya Çanda Hemşînan-HADIG beşdarî bernameyê bûne.

Di bernameyê de helbestên bi lazî hatine xwendin û stranên bi lazî hatine xwendin. Her weha derbarê rewşa nû ya lazî de jî axivîne.

Ji bo vîdeoya bernameyê, bitikîne

(NÖ/FD)