Muzîka Kurdî 2022: Hunermendên ciwan, albûmên yekem

Ji bo nûçeya tirkî bitikîne

Di Youtube-ê de dema mirov bi çendîn zimanan û bi gotinên muzîka kurdî digere, îsal weke ku ji her salan bêhtir Kurdish Mashup, Kurdish Trap, Kurdish Govend derdikeve.

Heman tişt di malperên lêgerînê yên mîna Google, Yandexê de jî wisa ye.

Ger em li gorî van encaman biçin, em dikarin bibêjin ku sala 2022yê ji bo muzîka kurdî sala Kurdish Mashup, Kurdish Trap û Kurdish Govendê ye.

Lê helbet ev rewş bi temamî ne wisa ye. Di nava sala 2022yê de bi dehan albûmên muzîkê yên bi kurdî hatine weşandin.

Em bixwazin muzîka kurdî ya sala 2022yê bi çend gotinan penase bikin, ew ê ev bin: Ciwan û albûmên yekem...

Îsal komek hunermendên ciwan albûm weşandin. Mîna Yahhya, Roleda, Senar Renda, Nubian, Reqso...Beşeke ji wan albûmên yekem bûn.

Taybetmendiyeke din a vê salê, beşek ji albûman, di encama berhevkariyên salan de derketine holê: Ayfer Duzdaş...

Her weha hin hunermendan albûm weşandin ku demeke dirêj e "deng ji wan dernediket": Farqîn Azad, Mirady...

Par ev trend di nava stranbêjên kurdan de gelekî diyar bû. Îsal jî vê rewşê dewam kir. Bêhtirên stranbêjan li şûna tevahiya albûmê, ji albûmên xwe stran weke single weşandin.

Lê berovajî vê rewşê, çendîn stranbêjan, tevahiya albûma wxe weşand: Dilovan, Rûken Yilmaz...

Qedexeyên li ser muzîka kurdî îsal bi berdewamî pêk hat. Li gelek bajaran dîsa konser hatin qedexekirin. Aynûr Dogan, Pervîn Çakar, Azad Bedran, Zinar Sozdar, NÇM beşek ji yên hatine qedexekirin.

Di dawiya salê de kuştina Mîr Perwerî li Parîsê yek ji bûyerên herî girîng ên sala 2022yê ye. Mîr Perwer bûbû penaber û li Parîsê dijiya. Di dema êrîşa li ser Navenda Çandê ya Kurdî ya Ahmet Kayayî tevî Emîne Kara û Abdullah Kizilî hatibû kuştin.

Alî Dogan Gonultaş - Gexî

Alî Dogan Gonultaşî ya bi navê "Gexî" albûmek weşand. Gonultaş demeke dirêj e ku bi muzîkê ve mijûl e. Beriya niha bi koma Ze Tijeyê re kar dikir. Lê çend sal in bi serê xwe ye û "Gexî" albûma wî ya yekem a solo ye.

Gonultaşî stranên vê albûmê li ser hev ne weşand lê mîna single-an weşand. Yekem strana vê albûmê jî "Bostano" bû. Piştî vê stranê, Alî Dogan Gonultaşî stranên din ji vê albûmê weşand. Albûma wî 6 meh in di lîsteya "Transglobal Charts"ê de ye.

Ayfer Duzdaş – Kilomên Arxûwanê

Ayfer Duzdaş di meha Kanûna Paşiyê de dest pê kir û stranek ji albûma xwe ya bi navê "Kilomên Arxûwanê" weşand. Duzdaş ev demeke dirêj li navçeya Arxûwanê ya Meletiyê û çendîn navçe û gundên wê yên din karê berhevkariyê dike. Ew li pey kilamên kurdên elewî ye û di encamê de jî ev albûm weşandiye.

Yahhya – Dereng

Yek ji stranbêjên ku di muzîka kurdî de nû ye û bi stîl û muzîka xwe balê dikişîne, Yahhya ye. Yahhyayî di sala 2022yê de albûma xwe ya yekem weşandiye. Navê albûma wî "Dereng" e. Di albûmê de 8 stran hene. Harûn Elkiyî aranjoriya vê albûmê kiriye ku reng û dengê Elkiyî xwe bi şêweyekî zelal diyar dike. Lê Yahhyayî bi xwe jî bi şêweyê xwe yê taybet rengekî cuda daye albûmê.

Roleda – Medûsa

Roleda jî weke Yahhyayî navekî nû ye di nava muzîka kurdî de. Di dawiya salê de stranek bi navê "Medûsa" weşand. Xwedî şêweyeke nû û cuda ye. Deng û rengê jî yê kurdî, bi muzîka rojavayî muzîkeke cuda derxistiye holê.

Senar Renda – Hatin

Navê sêyem ê ku me di sala 2022yê de bihîst Senar Renda bû. Ew rapbêj e û bêdengiya ku demeke di nava rapbêjên kurd de ye, bidawî kir. Senar Rendayî di abûma xwe ya bi navê "Hatin" de 7 stran strîne.

Reqso - Wey

Reqso jî weke Senar Rendayî rapbêj e. Reqsoyî strana bi navê "Wey" weşandiye ku wî bi xwe gotinên wê nivîsiye.

Nubian – Tarî

Nubian par çend stran weşandine. Îsal bi albûma xwe rêwîtiya xwe dewam kiriye. Navê albûma wê Tarî ye. 6 stran di albûmê de hene ku beşeke zêde jê Nubianê gotinên wê nivîsandine û muzîk ji wan re çêkiriye.

Meral Polat Trio – Ez kî me

Meral Polat ew û hevalên xwe li Ewropayê bi muzîkê re mijûl in. Muzîka wê soul û bluesa kurdî ye. Wê di sala 2022yê de albûmek bi navê Ez kî me derxistiye. Di albûmê de 9 stran hene ku 4 jê bi kurdî ne. Polatê strana bi navê "Elqajiyê" ya bi dengê Mîkaîl Aslanî navdar bûbû, bi şêweyeke nû straye. Ji bilî vê stranê strana bi navê "Ez kî me", "Wayê", "Diya" bi kurdî ne. 

Lale Koçgun - Paydâ

Lale Koçgunê albûma xwe ya duyem piştî 7 salan, di sala 2022yê de weşandiye. Navê albûmê "Paydâ" ye Albûm ji 12 stranan pêk hatiye. ji 12 stranan 7 stran cara pêşiyê di albûma Lale Koçgunê de hatine strîn. Koçgunê li gel stranên gelêrî, cih daye besteyan jî. 6 ji van stranan beste ne û 6 jî stranên gelêrî ne.

Rûken Yilmaz – Sê Çiya

Albûma Rûken Yilmazê ji 6 stranan pêk hatiye. Albûma wê ya nû bi navê "Sê Çiya" ye û him ji hêla aranjoriyê him jî ji hêla kompozîsyonê ji ya yekem cida ye. Di albûma "Sê Çiya" de bi tenê besteyek heye. Ew jî bi navê "Zeryê" ye. Talat Yeşîlî gotinên vê stranê nivîsiye û Nûrhak Kilagozî muzîka wê çêkiriye.

Ji bilî vê stranê her pênc stranên din gelêrî ne. Stranên gelêrî yên Rûken Yilmazê di albûmê de strîne, ji çendîn herêman hatine berhevkirin. Êlihê (Ez Xwestîme), Bêşebab (Sê Çiya), Botan (Berçelan), Behdînan (Mendê) û Ezdîxan (De Çêkin) in ev herêmên ku stran jê hatine berhevkirin.

Mirady - Delal

Mirady di rockbêjiya kurdî de xwedî reng û cihekî taybet e. Yek ji wan hunermandan e ku "zêde deng jê dernediket." Mirady di dawiya salê de albûmeke ku du stranan pêk hatiye weşandiye. "Delal" ji ber helbesteke Baba Tahir Uryanî hatiye çêkirin ya din jî strana Mihemed Arif Cizrawî ye ku navê wê "Gulnîşan" e. Miradiyî her du stran jî bi şêweyê rockê û rengê xwe strîne.

Yunis Das – Henase

Yûnis Dasî albûma xwe ya yekê ya solo weşandiye. Navê albûma Dasî, "Henase" ye. Di albûmê de 10 stran hene.

Hemû gotinên stranan wî bi xwe nivîsiye. Ji ber ku mijara besteyan an jî çêkirina stranên nû di muzîka kurdî de gelek caran dibin mijara guftûgoyan, em dikarin bibêjin ku bi şens û siûd e. Bi tenê di strana "Çûk û Gul"ê de çarîneke Çarîna pêşî ji rubaîyeke Omer Xeyamî girtiye û adapte kiriye.

Doğan Çelik – Kilamê Vayî

Dogan Çelîk bi kirmanckî ango zazakî stranan distirê. Beriya niha bi neh salan albûmek bi navê "Zewt" derxistibû. Çelîkî piştî vê albûma xwe ya yekem ya soloyê bi neh salan albûmeke nû derxistiye. Navê vê albûma wî "Kilamê Vayî" ye.
Çelîkî mîna albûma xwe ya yekem di vê albûmê de jî bi xwe gotinên hemû stranan nivîsiye û muzîk ji wan re çêkiriye.
Di albûmê de 9 stranên kirmanckî, 2 jî yên tirkî hene. Kalan Muzîkê albûma navborî weşandiye.

Alî Înanir – Rayîr

Albûma nû ya Alî Înanirî derketiye. Albûm bi navê "Rayîr" e û tê de 11 stran hene. Di vê albûmê de Înanirî 7 stranên bi zazakî strane. 2 stran bi kurmancî ne û yek jî bi ermenkî ye. Alî Înanirî ji bilî du stranan, hemû stran bi xwe çêkirine. Gotin ji wan re nivîsiye, muzîk çêkiriye ji wan re û besteya wan çêkiriye.

Yılmaz Çelik – Tirîjda

Yilmaz Çelîkî di albûma xwe de 10 stran strîne ku beşek ji wan bi kirmanckî ango zazakî ne. Yên din jî bi tirkî ne.

Erdoğan Emîr – Bavok

Albûma Erdoğan Emîrî ya bi navê "Bavok" yek ji wan albûmên salê bû. Di albûmê de 10 stran hene ku piştî 6 salan weşandiye. Di albûmê de stranên klasîk ên Dêrsimê bi şêwe û şîroveyeke nû hatine strîn.

Miraz – Narîn

Koma muzîkê, Miraz di dawiya salê de albûmeke bi navê "Narîn" weşandiye. Di albûmê de 12 stran hene ku beşeke mezin ji van stranan bi zaravayên kurdî ne. Yên din jî bi zimanên cuda cuda hatine strîn.

Bêwar Tekbaş - Nav Dilistanê

Bêwar Tekbaşî demeke berê bi navê "Nav Dilistanê" straneke nû weşand. Çavkaniya vê stranê Hesen Şerîf e. Beriya niha jî wî bi navê "Barê Giran", "Yarê" û "Temo Lawo" weşandibû. Bi gotina Tekbaşî bandora hunermendên mîna Mihemed Arif, Hesen Cizîrî, Erdewan Zaxoyî li ser wî û muzîka wî heye.

Farqîn Azad – Azadî

Solîstê Koma Azad Farqîn Azadî piştî demeke dirêj li ser navê xwe albûmek weşandiye. Di albûmê de 10 stran hene ku ji bilî du stranan yên din hemû beste ne.

Nûrcan Degîrmencî – Robar

Nûrcan Degîrmenciyê demên dirêj di bin banê Navenda Çanda Mezopotamyayê (NÇM) de karê muzîkê kiriye. Di sala 2022yê de maxi singlek bi navê “Robar” derxistiye. Strana Ciwan Hacoyî ya bi navê “Nazikê” him bi rengekî akûstîk, him jî bi rengekî rock straye. Her weha Degîrmenciyê strana ji herêma Goyanê ya bi navê “Hey Robar” jî straye.

Hîvda Gokel û Mucahît Goker – Awkê Kaşûn / Mi Bênî

Hîvda Gokelê tevî hunermend Mucahît Gokerî strana bi navê “Awkê Kaşûn / Mi Bênî” ya herêma Çewlikê straye. Gokelê her weha îsal strana “Min te dît bû li ser bîrê” jî straye.

Gulbahar Kavcû û Harûn – Xatûn

Gulbahar Kavcû û Harûn bi hev re strana Ciwan Hacoyî ya bi navê “Xatûn” strane.

Serhat Kûral – Leylo

Serhat Kûralî strana kurdî ya bi navê “Leylo” bi aranjoriya Nûrhak Kilagozî straye.

Xecê – Guldesteyek ji stranên Mihemed Şêxo

Xecê ji stranên Mihemed Şêxoyî albûmeke bijarte amade kiriye. Di albûmê de 10 stranên ku Mihemed Şêxoyî strîne hene. Xecê ev stran bi şêwe û rengê xwe ji nû ve şîrove kirine.

Dilovan – Bingeha me

Dilovan hunermendekî kevn ê muzîka kurdî ye. Dilovanî îsal albûmek bi navê "Bingeha me" derxistiye. 6 stran di vê albûmê de hene ku tevahiya wan jî beste ne.

Cemil Qoçgiri û Mikail Aslan - Reseno

Mîkaîl Aslan û Cemîl Qoçgirî wê di sala 2023yê de 20 saliya hevkariya xwe ya di muzîkê de pîroz bikin. Aslan û Qoçgiriyî ji bo vê 20 saliyê albûmek bi navê "Rû bi Rû" amade kiriye. Her du hunermendan yekem strana ji vê albûmê bi navê "Reseno" weşandiye.

Mehmûd Berazî – Hezar Dil

Muzîka ku Mehmûd Berazî çi bi tena serê xwe çi jî bi navê Hunergeha Welat dike, bandorê ne tenê li Rojavayê, lê li devereke gelek berfiher dike. Çi stranên çi bi navê Mehmûd Berazî çi bi navê Hunergeha Welat hatine amadekirin, di demeke kin de gelekî belav dibe. "Hezar Dil" yek ji berhemên dawî yên Mehmûd Beraziyî ye. Mehmed Berazî tevî Şêro Hindêyî ev stran ji bo fîlmê "Kobanê" amade kiriye. 

Suna Alan – Tu Bihata

Sûna Alanê helbesta Arjen Ariyî ya bi navê "Tu bihata" kiriye stran. Alanê bi xwe muzîk ji stranê re çêkiriye ku bi amûrên muzîkê yên modern û bi rengê muzîka moderna a cîhanî ve hatiye honandin.

Rewşan û Tara – Xûçê

Rewşan û Tara Mamedovayê bi hev re stranek nû amade kiriye û xwendiye. Navê strana wan "Xuçê" ye. "Xuç" formeke din a xuşk/xwişkê ye. Tara Mamedovayê gotinên stranê nivîsine, Rewşanê jî beste û muzîka wê çêkiriye.

Aryen Kom – Konserên Tamarayê

Di bin banê Aryen Hunerê de kar dike Aryen Kom. Di sala 2022yê de li Girava Tamarayê di bin navê "Konserên Tamarayê" de bernameyek saz kiriye. Stranên ku li wir hatine strîn hatine weşandin.

Pervîn Çakar – Mewlûda Kirmanckî

Soprano Pervîn Çakarê Mewlîda Kirmanckî ya Mele Ehmedê Xasiyî xwendiye.

Astare Artner

Astare Artnerê albûmeke ji çar stranan pêk hatiye derxistiye. Du stranên vê albûmê bi kirmanckî ne ku yek jê "Kamîlano" ya din jî "Erzingano" ye.

Diljen Ronî – Remastering

Diljen Roniyî du albûmên xwe ji nû ve tomar kiriye û weşandiye. Albûmên "Du Demsal" û "Çend Gotinên Evînê" yên ku Diljen Roniyî nû kiriye ango remastering kiriye û weşandiye.

Chopy – 7 miliard kes

Bahjat Yahya – Şakra Barfa

Bilind Îbrahîm – Hejarî

Haval İbrahim – Te suz dabû

Jahrmar û Erkan Baran – Baso

(FD)