.jpg)
Yek ji avakarên Koma Amedê ye Dr. Ahmet Kaya. Piştî kom belav bû, tevlî Serhat, Silêman û Fîkrî Kûtlayî Çar Newa ava kir. Gelek stran straye û di gelek stranên her du koman de keda wî heye. Ya bin herî zêde bi strana “Reben im” tê bîra min. Di albûma “MAK”ê ya Çar Newayê de ev stran strabû. Straneke dengbêjî ye. Me ji dengê Şakiroyî li vê stranê guhdarî kiribû. Kayayî ev stran bi şêweya muzîka Çarnewayê re ji nû ve şîrove kiribû û strabû. Him muzîka wê him jî dengê Ahmet Kayayî straneke gelekî xweş anîbû holê. Dengê Kayayî dengekî gelekî xurt e û gelek rengên cida tê de hene.
Dr. Ahmet Kayayî demeke berê bi navê “Payîza Derengî-1” albûmek derxist. Em vê taybetmeniya dengê Kayayî di vê albûmê de jî dibînin. Dengê Kayayî di strana “Çillê” ya gelêrî de dengek e û di stranên din de dengekî din e.
Kayayî tecbûreya xwe ya bi dehan salan di vê albûmê de derxistiye holê û bi hevkarên xwe re albûmeke xweş amade kiriye.
Albûm ne tenê ji hêla aranje û muzîkên wê ve ji hêla gotinan ve jî balkêş e. Di albûmê de 8 stran hene ku beşek ji wan ji ber helbestan çêbûne. Du jê ji ber helbestên Îbrahîm Seydo Aydoganî ne. Yek ji van “Bajarê Nav Xeyalan” e ku ji ber helbesta Aydoganî ya bi navê “Diyarbekir” ya din jî “Dora min” e.
Her weha du stran jî ji ber helbestên Fêrikê Ûsivî derketine. Yek jê “Kawkubara min” ya din jî “Meçe” ye.
Helbesteke din jî di albûmê de bûye stran û Kayayî straye ku ew jî ya “Qera min” e. Kayayî ev stran jî ji ber helbesta Cemîl Denliyî ya bi navê “Ev tav leylan û çavên te” çêkiriye.
Kaya di albûmê de bi gelek stranbêj û muzîkjenan re kar kiriye. Di gelek stranan de Tara Mamedova, Agît İşikî tevlî Ahmet Kayayî stran strane. İşikî gotinên strana “Bihara derengmayî” tevlî Ahmet Kayayî nivîsandiye. Zelal Gokçe, Mehmet Akbaş, Siyabent Aslan, Mustafa Bîber, Azîz Kûrtar jî tevlî Kayayî stran strane. Mustafa Biber, Ahmet Kaya û Harûn Elkî stranên di albûmê de saz kirine.
Ev ekîba ewqas berfireh û ji kesên cida pêk hatiye, bandor li ser muzîk û atmosfera albûmê jî kiriye.
Çend klîbên nû
Çiyayê ku em wî ji Koma Gulên Xerzanê nas dikin, di bin banê Navenda Çanda Mezopotamyayê xebatên xwe dewam dike. Çiya vê hefteyê vîdeo klîbek weşand ku navê wê “Hoy Nar” e. “Hoy Nar”, straneke gelêrî ye û ji herêma Colemêrgê hatiye berhevkirin.
Bêwar Tekbaş jî wê strana xwe ya be navê “Temo Lawo” îro di saetên êvarê de biweşîne. Ev stran jî gelêrî ye û Erdewan Zaxoyî çavkaniya vê stranê ye. Bêwar Tekbaşî aranjeya stranê kiriye.
Rapbêj Xemî albûma xwe ya nû qedandiye û wê di rojên pêş de biweşîne. Xem stranên ku amade kiriye wê yek bi yek ango weke single biweşîne.
Kursên muzîkê û yên zimanê kurdî
Navenda Çanda Mezopotamyayê wê Kargeha Muzîkê li dar bixe. Kargeh ji bo kesên ku bixwazin amûreke muzîkê fêr bibin wê pêk were. Pêvajoya serlêdanê îro ango 3yê Îlonê destpê kir.
Nûbihar Komele wê dersên zaravayên kurdî bi awayekî online bide. Komele wê ji bo zarokan dersên kurmancî û ji bo mezinan jî yên kurmancî, soranî û zazakî bidin. Dema serlêdanê destpê kiriye û heta 10ê Îlonê wê dewam bike. (FD)
