Di hesabê Telegramê yê Koalîsyona Filoya Azadiyê de derbarê rewşa dawî ya keştiyê de agahî hat dayîn. Artêşa Îsraîlê mudaxeleyî keştiya Madleenê kiriye û têkiliya bi keştiyê re qut bûye.
Di daxuyaniyê de hat diyar kirin ku artêşa Îsraîlê midaxele li keştiya Madleenê kiriye û her weha wiha hatiye gotin: "Têkiliya bi Madleenê re qut bûye. Artêşa Îsraîlê derketiye ser keştiyê. Xwebexşên di keştiya Madleenê de bûn ji aliyê artêşa Îsraîlê ve hatine revandin."
Di daxuyaniyê de hat xwestin ku divê zext li wezaretên karên derve yên welatên ku xwebexşên hatine revandin hemwelatiyê wan in were kirin da ku mafparêz di ewlehiyê de bin.
Yasemin Acara ku di keştiyê de bû vîdeoyekî kurt parve kiriye û di vîdeoyê de tê dîtin ku leşkerekî Îsraîlî ji wan re dibêje telefonên xwe bigirin.
Raportora NYê: "Dema Kaptan got keştiyek din nêzîk dibe, têkilî qut bû"
Raportora Taybet a Neteweyên Yekbûyî (NY) ya Filistînê Francesca Albaneseyê li ser hesabê xwe yê X parve kir ku wê bi kaptanê keştiya Madleenê re têkilî danî û dema ku keştî hatiye rawestandin kes birîndar nebûye.
Albaneseyê got, "Dema kaptan bi telefonê bi min re diaxivî min dengê leşkeran bihîst. Dema kaptan got 'keştiyeke din nêzîk dibe', têkilî qut bû."
12 kesên di keştiyê de bûn ev in:
Endama Parlamentoya Ewropayê (PE) ya Fransî Rima Hassan û welatiya Almanyayê Yasemin Acar, ji Tirkiyeyê Huseyin Şuayb Ordu, ji Brezîlyayê Thiago Avila, Sergio Toribio ji Spanyayê, Marco van Rennes ji Hollandayê, Baptiste Andre, Reva Viard, Pascal Maurieras û Yanis Mhamdi ji Fransayê, çalakvana avhewayê ya Swêdî Greta Thunberg û rojnameger Omar Faiad.
Îsraîl: Dê xwebexş ji bo welatên wan werin şandin
Îsraîlê ragihand ku keştiya Madleenê birine Îsraîlê û çalakvanên di keştiyê de ne dê ji bo welatên wan werin şandin.
Wezareta Karên Derve ya Îsraîlê derbarê rewşa 12 çalakvanên ku di keştiya Madleenê de bûn agahî da.
Di daxuyaniyê de hat gotin arteşê Îsraîlê bi qasî 185 kîlometreyan dûrî li Xezeyê dest danîye ser keştiya Madleenê û birine Îsraîlê û her weha çalakvan dê ji bo welatên wan werin şandin.
Çi bûbû?
Keştiya Madleenê ya 18 metreyî di 1ê Hezîranê de ji Bendera San Giovanni Li Cuti ya li bajarê Kataniayê ji bo Xezeyê bi rê ketibû.
Berdevkê Artêşa Îsraîlê Effie Defrin di daxuyaniyek çapemeniyê de got ku ew li dijî keştiya ku alîkariya mirovî dibe Xezeyê amadekariyê dikin.
Di 2ê Gulanê de keştiya Koalîsyona Fîloya Azadiyê ya bi navê “Conscience” li peravên Maltayê rastî êrişa dronan hatibû.
(AY)
*Çavkanî: AA
