Weqfa Îsmaîl Beşîkçiyî wê salvegera xwe pîroz bike

Fotograf: Weqfa Îsmaîl Beşîkçiyî / Twitter

Weqfa Îsmaîl Beşîkçiyî wê salvegera xwe bi bernameyeke taybet pîroz bike.

Bernameya pîrozkirinê wê li Stenbolê, li avahiya Weqfê ya li Taksîma Stenbolê pêk bê. Îsmaîl Beşîkçî , Serokê Lijneya Rêveberiya Weqfê Îbrahîm Gurbuz , endamên lijneya rêveberiyê, dost û dildarên weqfê wê beşdarî bernameyê bibin. Bername wê 7ê Kanûna Paşiyê roja şemiyê saet di 15.00ê de pêk bê û hunermend Berfîn Aktay û Mihemedê Serhedî wê bernameyê bi rêve bibin.

Derbarê Weqfa Îsmaîl Beşîkçiyî de

Li ser navê Dr. Îsmaîl Beşîkcî ku temenê xwe li ser xebatên kurdî,  bi awayek azad vegotina fikarên rexneyî û ji bo parastina azadiyên akademîk feda kiriye, bi armanca vejandina têkoşîna wî, xebatên wî û rêbaza wî ya zanyarî di sala 2011an de hatiye avakirin.

Koleksîyona şexsî ya Beşîkçî jî di nav de 12 hezar pirtûk, 800 kovarên cuda û arşîva ku nêzî 3 hezar hejmarî ku ji 97 rojnameyên cuda pêk tên, bi navê pirtûkxaneya lêkolînê ya WÎBê ji xwînerên xwe re vekiriye. Şax û pirtûkxaneyeke weqfê li Amedê  ji sala 2014an û bi vir de xebatên xwe dimeşîne.

Heta îroj li gel gelek panel, semîner, civîn, kargeh û akademîyan di sala 2013an de yekemîn konferansa xebatên Kurdî yên navneteweyî li dar xistiye.

Li gel hemû berhemên Beşîkciyî weqf gelek berhemên qada xebatên kurdî digihîne xwînerên xwe û ji 2017an vir ve bi heman kesan û lijneya xwe ya weşanê kovara ''Kürt  Tarihi'' derdixe. (FD)