Ji bo nûçeya Tirkî / İngilîzî bitikîne
Dihat plankirin ku Rojên Filman ên LGBTİ yên Alman li Enqereyê bi rê ve biçe. Lê piştî ku li ser medyaya civakî bi hashtagên #LGBTFilmGünleriİptalEdilsin (Bila Rojên Filman ên LGBTİyê bên betalkirin) û #İstiklalimizeKaraLeke (Lekeya reş li ser serxwebûna me) êrîşên bi nefret pêk hatin, Walîtiyê bername qedexe kir.
Rojên Filman ên LGBTİ yên Alman wê bi hevkariya Balyozxaneya Almanyayê, KuirFest û Sînemaya Büyülü Fenerê di navbera 16 û 17yê Çiriya Paşiyê de birêve biça.
M. T. T. B. yê gef xwarin, daxwaza betalkirinê kir
Piştî aşkerekirina bernameyê li ser medyaya civakî bi îmzeya Yekîtiya Xwendekarên Tirk a Milî (M. T. T. B.) li ser medyaya civakî bi sernavê #İstiklalimizeKaraLeke (Lekeya reş li ser serxwebûna me) nivîsek hat parvekirin.
Di nivîsê de gelek caran behsa “xwînê” hatiye kirin û sedema belaşbûna bernameyê weke “têkbirina nirxên milî û menewî” hatiye nîşandin. Her wihe behsa qewmê Lût hatiye kirin û ji rayedaran hatiye xwestin ku bernameyê betal bikin.
Her wiha bang hatiye kirin ku şeva 14yê Çiriya Paşiyê li ser medyaya civakî bi hashtaga #İstiklalimizeKaraLeke (Lekeya reş li ser serxwebûna me) çalakî bê lidarxistin.
Tenê 250 tweet hatiye avêtin
Li ser Twitterê 123 kesan bi hashtaga #İstiklalimizeKaraLeke (Lekeya reş li ser serxwebûna me) 265 tweet avêtine.
Bi hashtaga #LGBTFilmGünleriİptalEdilsin (Bila rojên filman ên LGBT bên betalkirin) jî 23 kesan 30 tweet avêtine.
Walîtiyê bername “qedexe kir”
Piştî 295 tweetên ku li ser medyaya civakî hatin avêtin Walîtiya Enqereyê ket nava liv û tevgerê û di 15yê Çiriya Paşiyê de li ser malpera fermî daxuyaniyek belav kir.
Walîtiyê di daxuyaniyê de diyar kir ku li ser medyaya civakî derbarê “organîzasyona nîşandana filmên ku hin hesasiyet û hestiyariyên civakî dihewîne” de hin agahî hene û “di çarçoveya Xala 11/Cyê ya Yasaya Birêvebirinê ya Bajêr ya hejmar 5442yê, Xala 17yê ya Yasaya Meş Xwenîşandan û Kombûnê ya hejmar 2991yê û Xala 11/Fyê ya Yasala Rewşa Awarte ya 2935ê de organîzasyona nîşandana filman a wê di navbera 15 û 17yê Çiriya Paşiyê ya 2017yê de li tevahiya bajarê me û li Salona Sînemayê ya Büyülü Fenerê çêbibe ji hêla Walîtiya me ve hatiye qedexekirin”.
“Di bin navê ‘parastinê’ de me ji mafên me yên destûrî mehrûm dikin”
Piştî biryara qedexekirinê ya Walîtiyê ekîba Pembe Hayat KuirFestê daxuyaniyek belav kir û diyar kir, wezîfeya Walîtiyê ne ew e ku çalakiyê qedexe bike lê ji bo bi rengekî ewle çêbibe tedbîran bistîne. (ÇT/FD)
