Walîtiya Enqereyê 12emîn KuirFest a Jiyana Şîrikî qedexe kir

Midûriyeta Beşa Karên Hiqûqî ya Walîtiya Enqereyê, Festîvala 12emîn KuirFest a Jiyana Şîrikî qedexe kir. Festîval wê di navbera 23-25ê Sibatê de li Enstîtuya Goethe ya Enqereyê, Navenda Çandê û Perwerdehiyê ya Odeya Endezyarên Makîneyan û Komeleya Civaka Sivîl bihata lidarxistin.

Biryara qedexeyê duh (22ê Sibatê) beriya destpêkirina festîvalê bi nîv saetê ji aktîvîstên Komeleya Piştevaniyê ya LGBTI+ ya Jiyana Şîrîkî re hat ragihandin.

Komeleya Jiyana Şîrikî bi rêya parêzerên xwe ji bo rawestandina biryarê, serî li Dadgeha Îdarî da.

Li gorî daxuyaniya Komeleya Lêkolînên Medya û Hiqûqê (MLSA), Walîtiya Enqereyê diyar kir ku "ji bo parastina sîstema giştî, tenduristiya giştî û exlaqê giştî û maf û azadiyên kesên din" çalakî hatine qedexekirin.

Walîtiya Enqereyê di serdema Rewşa Awarte (OHAL) de du caran qedexeya bêdawî li ser hemû çalakiyên komeleyên LGBTI+ danîbû û ev qedexe ji aliyê dadgeha îdarî ve hatibû betalkirin.

Komeleyê derbarê biryara qedexeyê de daxuyanî da û wiha got:

“Kuirfesta 12emîn a Jiyana Şîrikî dê çalakiyên xwe yên online bê navber bidomîne. Tu wextê xwe diyar bikî, salnameya xwe neguherî û li benda me bî, lubunya. "Va ye em vegeriyan û carekê ji deve me derket evîndara/ê min, ew ê nikaribin li pêşiya me bibin asteng ku em zivistanê germ bikin."

(TY/FD)