Nûçegihana bianetê ya Amedê Evrîm Denîzê piştî fotografa ku di mîtînga 8ê Adarê Roja Jinan a Cîhanî de kişandibû, parve kir, li ser medyaya civakî weke hedef hat nîşandan û rastî êrîşên zayendperest û nîjadperest hat.

Piştî ku Denîzê wêneyê dayika aştiyê ya bi pankarta "Bila mobîng, cudakarî, tundkarî û tacîza li dijî LGBTI+yan bi dawî bibe" parve kir, li ser platforma Xê weke hedef hat nîşandan. Her weha Denîz rastî gef û êrişên zayendperest hat û gefa kuştinê lê hat xwarin.

Denîz dê li Edliyeya Amedê li dijî êrîşên ku lê hatin kirin gilî bike.

Denîz: Tu qad ji bo me jinên rojnameger bi ewle nîne

Nûçegihana bianetê Evrîm Denîz derbarê êrîşên ku li wê hatiye kirin de wiha axivî:

"Ez rojnamegerek im ku bi salan e li Amedê dixebitim û li kîderê be jî heke binpêkirina mafan hebe ez ji bo wê binpêkirinê derxim holê kedê didim.  Pankarta ku duh min li qadê kişand û parve kir ya Tora Têkoşîna Li Dijî Tûndkariyê ya Amedê (DAKAP) bû ku li ser "Bila mobîng, cudakarî, tundkarî û tacîza li dijî LGBTI+yan bi dawî bibe" nivîsandîbû. Ji ber ku min ev pankart parve kir ez weke hedef hatim nîşandan.

"Tu qad ji bo me jinên rojnameger bi ewle nîne. Bi taybet di rojeke weke 8ê Adarê de, peyamên di naveroka wan de tecawiz, kuştin û heqaretan hene, careke din tiştên ku jinên rojnameger dijîn, raxist ber çavan. Ez ê sibê derbarê van hemûyan de gilî bikim."

DÎSK Basin-Îş: Em ê gilî bikin

Piştî ku Denîz li ser medyaya civakî hedef hat girtin, gelek saziyên çapemeniyê û jinan daxuyanî dan.

DÎSK Basîn-Îşê jî êrîşa li dijî endama wan Evrîm Denîzê hat kirin şermezar kir û diyar kir ku dê sibê li dijî êrîşan gilî bikin.

DFG: Denîzê erka xwe ya rojnamegeriyê kiriye

Komeleya Rojnamegerên Dîcle Firatê diyar kir ku ew gefên li dijî rojnameger Evrîm Denîzê qebûl nakin, ev daxuyanî da:

“Evrîm Denîz erka xwe ya rojnamegeriyê pêk aniye. Coşa ku li qadê û peyamên ku li ser pankartan bi fotografan di nûçeya xwe de bikar anîye û ev jî karekî rojnamegeriyê ye. Her çiqas li ser pankartê logoya saziya amadekar hebe jî hedefgirtin, gefa xwarin û parvekirina navnîşana malê ya rojnamegerk nayê qebûlkirin.

MKG: Em hedef nîşandanê qebûl nakin

Komeleya Rojnamegerên Jin a Mezopotamyayê li ser medyaya civakî daxuyanî da û got, "Rojnameger Evrîm Denîzê ji ber ku di mîtînga 8ê Adarê Roja Jinan a Cîhanî de fotografa pankarta ku têkildarî LGBTI+yan e kişandiye û parve kiriye li ser medyaya civakî rastî gotinên zayendperest û gefan hat. Em qebûl nakin ku navnîşana malê ya rojnameger bi were parvekirin û bi awayekî vekirî bikin hedef."

Komîsyona Mafên LGBTI+yan ya Baroya Amedê: Em pêvajoyê dişopînin

Di daxuyaniya komîsyonê de wiha hat gotin: "Rojnameger Evrîm Denîzê piştî ku pankarta li ser "Bila mobîng, cudakarî, tundkarî û tacîza li dijî LGBTI+yan bi dawî bibe” nivîsandî ya ku jinan di bernameya 8ê Adarê de hildabûn, parve kir rastî gef û heqaretan hat. Em li gel Evrîm Denîzê ne. Em ê pêvajoya hiqûqî bişopînin. @_evrimdnz."

Komeleya Jinan a Rosa: Em li gel Evrîm Denîzê ne

Di daxuyaniya têkildarî heqaret û gefên li dijî Evrîm Denîzê de weha hat gotin, "Em di 8ê Adarê de li dijî "hemû cûre" newekhevî, kedmêjî û têkiliyên serdestiyê, ji bo  jiyana azad û wekhev li qadan bûn.

Bi vê mebestê hevala me ya rojnameger Evrîm Denîz li qadê bû û ked dida. Denîz ji ber wêneyekî ku kişandiye rastî êrîş, gef, heqaret û dijûnan hat. Em vê bi tundî şermezar dikin!

Em bi Evrîm DENÎZ re ne ku li dijî van êrîşên ku xizmetê ji polarbûna civakî re dike!

Eren Keskin: Dayikên xoşewîst û rojnamegera xoşewîst Evrîm Denîz

Parêzvana mafên mirovan Eren Keskînê jî bi van gotinan piştgirî da: "Li ku derê binpêkirina mafan hebe, tevgera jinan û belkî jî ji hemûyan zêdetir tevgera jinên Kurd li wir e. Hewldidin hin mirovan bikin ‘mijara nefretê’, sekna li gel wan mirovan helwesteke bi rûmet e. Dayikên xoşewîst û rojnamegera xoşewîst Evrîm Denîz.”

DAKAHDER: Em van êrîşên ku civakê dualî dikin, şermezar dikin

DAKAHDERê bertek nîşanî êrîş û gefên li dijî rojnameger Evrîm Denîzê da û wiha got:

"Di 8ê Adarê de em bi hev re bûn ku ji bo daxwaza xwe ya wekhevî û azadiyê bînin ziman. Me li dijî her cure newekhevî, kedmêjî û zextan li qadan helwesta xwe nîşan da. Lê belê rojnameger Evrîm Denîz ji bo ku dîmenê vê hevgirtinê bigire ked da û ji ber fotoğrafa ku kişand rastî gef û heqaretan hat û hedef hat nîşandan. Em vê tu carî qebûl nakin! Em van êrîşên ku civakê dualî dikin, şermezar dikin. Rojnameger Evrîm Denîz ne bi tenê ye!”

Ji RSFê Erol Onderoglû: Tu kes nikare wî mafî di xwe de bibîne û ewlehiya rojnameger bixe metirsiyê

Nûnerê Tirkiyeyê yê Rojnamegerên Sînornenas Erol Onderoglû têkildarî gefên li ser rojnameger Evrîm Denîzê daxuyanî da.

"Rojnameger Evrîm Denîz tenê ji ber ku fotoğrafa pankarta li ser "Bila mobîng, cudakarî, tundkarî û tacîza li dijî LGBTI+yan bi dawî bibe” nivîsandî, kişand û  parve kir, rastî êrişa devkî ya zayendperest û gefan hat. Ev nayê qebûlkirin. Tu kes nikare wî mafî di xwe de bibîne û ewlehiya rojnameger bixe metirsiyê.”

(AD/AY)