Fotograf: UNICEF
Ji bo nûçeya Tirkî bitikîne
Fonda Alîkariyê ya bi Zarokan re ya Neteweyên Yekgirtî (UNICEF) raporek derbarê sala 2017yê da aşkere kir û di vê raporê de diyar kir ku zarokên li herêmên şer û pevçûnan dijîn, her diçe bêhtir çekan bi kar tînin.
Iraq, Sûriye, Yemen, Nîjerya, Sûdana Başûr û Myanmar welatên sereke ne ku li dijî hiqûqa navnetewî zarokan ber bi şer ve kaş dikin.
Li gorî heman raporê zarok rastî tecawizê, bi darê zorê zewicandinê û kolekirinê hatine.
Zarokên ku tên rizgarkirin rastî istismara hêzên ewlehiyê yên fermî tên
Rapor diyar dike ku hêzên tundrew zarokan direvînin û wan di nava refên xwe de dihêlin, lê zarokên ku tên rizgarkirin rastî istismara hêzên ewlehiyê yên fermî tên.
Hin ji wan rastî bandorên nerasterast ên nexweşiyan, kêmxwarinî û kêmvexwariniyê tên.
Heman rapor diyar dike ku dibistan û nexweşxaneyên li herêmên ku şer lê hene bi zanebûn tên hedefgirtin.
Manuel Fontaine Dîrektorê Programê yê UNICEFê got ku zarok li malên xwe, li dibistanan û ciyên lîstikê rastî êrîşan tên.
Rapora UNICEFê destnîşan dike ku 27 milyon zarokên ku li herêmên şer dijîn nikarin biçin dibistanan.
Nîvê Arakaniyên ku reviyane Bangladeşê zarok bûn
Li Efxanistanê di 9 mehên pêşiyê yên salê de 700 zarok hatine kuştin. Zarokên Arakanî yên li Myanmarê jî bi awayekî rêkûpêk rastî tundkariyê hatine û bi darê zorê ji cî û warên xwe hatine derxistin. Nîvê 650 hezar kesên ku neçar mane ji Arakanê birevin û biçin Bangladeşê zarok bûne û temenê wan kêmî 18yê bûn.
UNICEF bang li wan hikûmet û hêzan dike ku li herêmên şer in û ji wan dixwaze ku li gorî rêzikên hiqûqa mirovî ya navnetewî tev bigerin û demildest dawî li tundkariya li hemberî zarokan bînin. (PT/FD)
