*Fotograf: HDP/Arşiv
Ji bo nûçeya tirkî / ingilîzî bitikîne
Parlamentera Partiya Demokratîk a Gelan (HDP), Feleknas Ûcayê binpêkirinên ku li Efrînê pêk tên ji Wezîrê Karûbarên Derve, Mevlût Çavûşoglûyî pirsiye.
Ûcayê behsa raporên Neteweyên Yekgirtî (NY) kiriye û wiha gotiye: “Efrîn bûye navenda talankirinê, destdanînê, tecawiz, paqijiya etnîsîteyan û heta niha zêdeterî hezar jin hatine revandin.”
Ûcayê destnîşan kiriye ku çarenûsa van jinên hatine revandin nayê zanîn: “Li gorî rêxistinên civaka sivîl ên Efrînê aşkere kirine, li bajêr di navbera 18ê adara 2018an û 25ê Çiriya Pêşiyê ya 2021an de 84 jin hatine qetilkirin. 6 jinan xwe kuştiye, êrîşa zayendî li 71 jinan bûye. Komeleya Mafên Mirovan a Efrînê diyar kiriye ku ji roja destpêkirina êrîşên TSK (Hêzên Çekdar ên Tirkan) û komên piştgiriya wê dike, tawanên li dijî jinan û yên şerî bênavber dewam kirine.”
Ûcayê ji Çavûşoglû xwestiye ku van pirsan bibersivînê:
Ji Adara 2018an û vir ve li Efrînê çend jin hatine revandin û windakirin? Çarenûsa jinên ku komên Tirkiye piştgiriya wan dike, ew revandine çi ye?
Gelo polîtikayeke wê ya bergiriyê ya ji bo kiryarên dijmirovî û ya li dijî qetilkirina jinên li Efrînê heye yan na?
Gelo ji bo jin û zarokên keç ên komên çekdar wan direvînin, xebateke we heye ku hûn wan bibînin û radestî malbatên wan bikin?
Gelo ji bo tawanên li dijî jinan û yên şerî yên komên Tirkiye piştgiriya wan dike û 3 sal in dewam dikin û di raporên navnetewî de jî behsa wan bûne, lêpirsîneke bibandor heye yan na? Ti kar û barên qanûnî ji bo berpirsan hatiye kirin yan na? Wê ti tiştek bê kirin yan na?
Ti xebateke we ya ji bo dadgehkirina kesên li Efrînê tawanên weke talankirin, revandin û îşkenceyê dikin, heye yan na?
Li Efrînê çi bûbû?
Piştî ku di havîna 2012yan de artêşa dewletê ya Sûriyeyê ji Efrînê vekişiya, PYDyê ev der xist bin kontrola xwe.
Artêşa Çekdar a Tirkan (TSK) di 20ê Kanûna Paşiyê ya 2018an de bi Artêşa Azad a Sûriyeyê re operasyoneke leşkerî li vir pêk anî.
Di 26ê Adara 2018an de ev der kete bin kontrola TSK û komên piştgiriya wê dike.
Li gorî rapora rêxistina Çavdêriya li Mafên Mirovan a Sûriyeyê, di dema vê operasyona Tirkiyeyê de 584 endamên YPG û Hêzên Sûriyeya Demokratîk (HSD), 91 leşkerên Hêzên Çekdar ên Sûriyeyê, 604 milîsên Artêşa Netewî ya Sûriyeyê û 85 endamên TSKyê mirin. (RT/FD)
