Trump aşkere kir ku ew ê cezayên li ser Sûriyeyê rabike
Serokê Dewletên Yekbûyî yên Amerîkayê(DYA) Donald Trump li Riyada paytexta Erebistana Siûdi ragihand ku hikumeta wî biryar daye ku cezayên li ser Sûriyeyê rake.
Serokê Dewletên Yekbûyî yên Amerîkayê(DYA) Donald Trump destnîşan kir û got, "Min biryar da ku cezayên li ser Sûriyeyê rabikim, ev biryar jî piştî ku min li gel Serokkomarê Tirkiyeyê Recep Tayyip Erdogan û Şazadayê Cihnîşîn ê Siûdiyê Mihemed bin Selman guftûgo kir, da."
Li gorî nûçeya Rûdawê serokê DYAyê Trump destnîşan kir ku "Dema wê hatiye ku em şansekî bidin Sûriyeyê û hêviya bextekî baştir ji we re dixwazim."
Her weha Trump di beşeke din a axaftina xwe de diyar kiriye û gotiye, "Sûriye rastî karesatên mezin û trajediyên giran hatiye," û hêvîdar e ku birêveberiya niha ya welêt di bidestxistina aştî û aramiyê de ji bo welatê xwe bi ser bikeve.
Bi gotina xwe, ew yekem gav avêtine ji bo asayîkirina têkiliyên xwe bi Sûriyeyê re.
Serokê Amerîkayê behsa wê yekê jî kir ku Wezîrê Karên Derve yê welatê wî Marco Rubio dê li gel Wezîrê Karên Derve yê Sûriyeyê Eshed Şeybanî li Tirkiyeyê bicive, lê dema civînê nediyar kir.
Her wiha Neteweyên Yekbûyî piştî ku axaftinên wî bi dawî bûn, piştgirî da biryara Donald Trump a ji bo rakirina dorpêçên Amerîkayê yên li ser Sûriyeyê kir.
(AY)