Tirkiyeyê li Bakur û Rojhilatê Sûriyeyê bi dehan dever bombebaran kirin

Piştî ku li herêma Zapê 9 leşker mirin, Tirkiyeyê li dijî Bakur û Rojhilatê Sûriyeyê (Rojava) dest bi êrîşên asmanî û topbaranê kir. 

Li gorî nûçeya ajansa nûçeyan a Hawarê (ANHA), balafirên şer û yên bêmirov ên biçek, ji şeva 12ê Kanûna Paşiyê û pê de li Dêrik, Qamişlo, Amûdê, Dirbêsiyê, Kobanî û Şehbayê gelek dever bombebaran kirin. 

Li gorî heman nûçeyê, Tirkiyeyê di 48 saetên dawî de 56 dever bombebarankirin. 

Şeva 12-13yê Kanûna Paşiyê îstasyona petrolê ya Zarba û navendeke din a petrole ya li başûrê rojhilatê navçeya Tirbespiyê û Bendava Başûtê ya rojhilatê bajarê Dêrikê 5 caran bi balafiran hatin bombebarankirin.

Hemû êrîşên din di şeva 13 û 14yê Kanûna Paşiyê û tevahiya 14yê mehê heta sibeha 15yê mehê pêk hatin.

Cihên hatine bombebarankirin wiha ne:

• Gundên Xirbet Şeala û Hirbil ên kantona Efrîn û Şehbayê hatin topbarankirin. Bi 2 roketan xala hêzên hikumeta Şamê ya li bendava Şehbayê hate bombebarankirin.
• Xala hêzên hikumeta Şamê ya li gundê Xerbîsan a Kobanê bi balafira bêmirov a biçek hate bombekirin.
• Gundê Şewarxa yê navçeya Şera yê Efrînê hat topbarankirin.
• Îstasyona petrolê ya li başûrê rojavayê navçeya Tirbesipiyê ya di navbera gundên Gir Dahol û Gir Şêran de hatin bombebarankirin.
• Bankeya çandiniyê ya li başûrê Tirbespiyê, devera navbera gundên Gir Kendal û gundê Şirk ên herêma Koçerat a Dêrikê de hat bombebarankirin.

Navenda navçeya Eyn Îsayê

• Îstasyona elektrîkê ya Eyn Îsayê.
• Benda kontrolê ya li deriyê başûr ya ketina Eyn Îsayê.
• Gundê Xalidiyê yê rojavayê navenda navçeya Eyn Îsayê.
• Bajarokê Celebiyê yê 45 kîlometre li başûrê bajarê Kobaniyê.
• Navenda Temwînê (Çavdêriya bazarê) ya li Dirbêsiyê.
• Cihê berê yê şirketa Lavarge ya fransî ya li rojhilatê Kobanî 3 caran hat bombebarankirin.
• Di êrişa bi balafira bêmirov a biçek a li ser gundê Kerbetlî yê navçeya Dirbêsiyê  de jina bi navê Ehlam Ebdurezaq Remo û zarokên wê Rojan (3) û Can (4) birîndar bûn.
• Îstasyona elektrîkê ya bajarê Kobaniyê.
• Gundê Berkevirê yê Dirbêsiyê.
• Çewlika pez a li gundê Şêx Copan ê başûrê bajarê Kobaniyê hat bombebarankirin.
• Li devera navbera gundên Quneytra û Şaemsûrê ya rojavayê Dirbêsiyê 3 cih hatin bombebarankirin.
• Xala hêzên Şamê ya li gundê Şewarxe ya navçeya Şerayê 3 caran hat topbarankirin.
• Tîmên agirkujiyê yên hewl didan şewata ji ber bombebaranê ya li şîrketa Lavarge ya li Kobaniyê vemirînin, ji aliyê balafirên dewleta tirkan ve hatin hedefgirtin.
• Li navneda bajarê Kobaniyê embareke genim hat bombebarankirin.
• Li rojavayê bajarê Kobaniyê daristanek hat bombebarankirin.
• Di êrişa hewayî ya li dijî xala hêzên Şamê ya li gundê Dibane ya Qamişloyê de 5 leşkerên Şamê mirin.
• Îstasyona elektrîkê ya li navçeya Amûdê û gundê Kotihê yê rojavayê navçeyê hatin bombebarankirin.
• Rojnamegerên dîmenên êrişa li Kobanê dikişandin jî hatin hedefkirin.
• Aşxaneya Dirbas a li Amûdê hat bombebarankirin û 2 karkerên bi navê Mihemed Xêr Şêxî (23) û Hisên Ayiş Hisên (45) birîndar bûn.
• Gundê Merkeba yê Amûdê hat hedefkirin.
• Şirketa Nêrgiz a li gundê Heremê Şêxo yê rojavayê bajarê Qamişloyê hat hedefkirin.
• Îstasyona kerebeyê ya li Qamişlo hat bombebarankirin.
• Depoyek li ser rêya balafirgeha Qamişloyê hat bombebarankirin. Di êrişê de zarokek bi navê Hêlin Mihemed birîndar bû.
• Dibistana fêrkirina ajokariyê ya bajarokê Girbawî yê Qamişlo hat bombebarankirin.
• Kargeha çêkirina helawê û tehînê ya li rojavayê Qamişlo hat bombebarankirin.
• Depoyeke amûrên xizmetguzariyê ya li nêzî balafirgeha Qamişloyê hat bombebarankirin.
• Îstasyoneke petrolê ya li başûrê rojavayê Tirbespiyê hat bombebarankirin.
• Benda Hêzên Ewlekariya Hundirîn a li gundê Xeznê ya Tirbespiyê hat bombebarankirin.
• Cihê petrolê yê li gundê Xatûne yê Tirbespiyê hat bombebarankirin.
• Îstasyona petrolê ya Ude ya li rojhilatê Tirbespiyê hat bombebarankirin.
• Îstasyona gazê ya sereke ya li Tirbespiyê 10 caran hat bombebarankirin.
• Benda kontrolê ya hêzên ewlekariyê ya li gundê Kevirê Spî yê başûrê rojavayê Qamişlo hat bombebarankirin.
• Îstasyona elektirîkê ya li Tirbespiyê hat bombebarankirin.
• Navenda petrolê ya li rojhilatê Tirbespiyê 3 caran hat bombebarankirin.
• Navenda petrolê ya li gundê Girê Pirê yê Tirbespiyê hat bombebarankirin.
• Navenda Siwêdiyê ya ku elektrîkê dide kantona Cizîrê hat bombebarankirin.
• Navenda Tifle ya safîkirina sotemeniyê ya li herêma Koçerat a Dêrikê hat bombebarankirin.
• Îstasyona xazê ya li gundê Siwêdiyê ya li navbera Girkê Legê û Dêrikê 10 caran hat bombebarankirin.
• Gundên Eyn Deqnê, Minx û derdora navçeya Til Rifatê yên girêdayî Şehbayê hatin topbarankirin.

Êrîşên sibeha 15yê Kanûna Paşiyê

• Li navçeya Til Temirê depoyên genim ên Um Kêf ên rojavayê navçeyê bi çekên giran hatin topbarankirin.
• Embarên genim ên li Um El-Kif ên li rojavayê Til Temirê ji aliyê artêşa Tirk a dagirker û çeteyên wê ve hatin topbarankirin.

(FD)