Cemiyeta Rojnamegerên Tirkiyeyê (TGC) têkildarî biryara Lijneya Bilind a Radyo û Televîzyonan (RTUK) daxuyanî da. RTUKê weşana Halk TV û Sozcu TVyê ji bo 10 rojan dabû rawestandin.
Di daxuyaniya Lijneya Rêvebir a TGCyê de biryara RTUKê weke "derbeyek giran li dijî azadiya çapemeniyê û azadiya derbirînê ya ku di bin garantiya Destûra Bingehîn de ye" hat binavkirin.
TGCyê diyar kir ku mafê gel yê wergirtina agahiyan hatiye rawestandin û got, "Biryara rawestandina weşanê ya ducarî ya RTUKê a bi hincetên neheq û neqanûnî ne tenê armanc dike ku rojnamegeran bêdeng bike, dixwaze tevahiya civakê bêdeng bike."
"Biryar ji ber sedemên siyasî têne dayîn"
TGC diyar kir ku RTUK hewl dide bi cezayên ku dane medyayê, medyayê ji nîqaşkirina mijarên giştî dûr bixe û pêşî li nûçeyên rexnegir bigire û weha got:
"Saziyên medyayê yên ku xebatên desthilatdariyê yên ne li gor berjewendiyên giştî ne dikin nûçe, bi rawestandina weşanê û cezayên pereyan di bin zextê de ne û ji aliyê aborî ve tên lawazkirin. Her weha Lijneya Bilind a Radyo û Televîzyonan di civîna xwe ya roja Pêncşema 3ê Tîrmeha 2025an de ji ber şîroveyên wê yên li ser karîkatura kovara LeManê pênc bernameyên Sozcu TVyê rawestand. Li Tele 1ê ji ber jêrnivîsên mîtînga Saraçhaneyê cezayê pereyan birîn.Nayê qebûlkirin ku RTUK ji sînorên rayeya xwe derbas bibe û ji ber sedemên siyasî biryaran bide. Pêkanînên bi vî rengî nîşaneya herî zelal e ku hêza desthilatdariyê veguheriye mekanîzmayeke sansurê."
"Rojnamegerî ne sûc e"
TGCyê bang li desthilatdariyê kir ku rêzê li Destûra Bingehîn, azadiya çapemenî û derbirînê bigire û her weha bang li RTUKê jî kir ku li gorî prensîbên bêalîbûn û berjewendiya giştî tevbigere û weha got: "Astengkirina çêkirina nûçeyan a rojnamegeran û reşkirina kanalên televîzyonê dê pirsgirêkên li welêt çareser neke. Ew ê demokrasiyê paşde bixe. Rojnamegerî ne sûc e."
(VC/AY)
