Têkildarî êrişan li Zonguldakê a li dijî karkerên Kurd lêpirsîn hat destpêkirin
Welatiyên Kurd ku ji navçeya Silopiya Şirnexê ji bo karê komkirina findiqan çûne gundê Bektaşliyê ya navçeya Alapliyê ya Zonguldakê, bi êrişên nijadperestan re rû bi rû man.
Li gorî nûçeya Ajansa Welat zêdetirî 70 karkerên ji Şirnexê yên ku ji bo komkirina findiqan çûbûn Zonguldakê, 2 caran rastî êrişê hatin. Her weha êriş li gundê Bektaşliyê yê Zonguldakê qewimî.
Gurlek: Lêpirsîn hat destpêkirin
Wezîrê Dadê Akin Gurlek aşkere kir ku li ser bûyerê dest bi lêpirsînê hatiye kirin. Gurlek destnîşan kir ku Serdozgeriya Komarê ya Eregliya Deryaya Reş lêpirsîn daye destpêkirin.
Her weha Gurlek da zanîn ku ji bo ronîkirina bûyerê kar û barên pêwîst bi hûrgilî didomin. Akin Gurlek tekez kir ku divê wateyên cihêreng li bûyerê neyên barkirin û got:
"Karkerên me yên çandiniyê yên demsalî jî di nav de, aramiya her welatiyekî me, ewlehî û parastina mafên wan di bin garantiya dewleta me de ye."
Wezîrê Dadê diyar kir ku dê saziyên dadî li hemberî berpirsiyarên bûyerê karê xwe bikin. Wî di dawiya daxuyaniya xwe de destnîşan kir ku lêpirsîn didome.
DEM Partiyê daxwaza lêkolînê kir
DEM Partiyê jî daxuyaniyek da û diyar kir ku li Zonguldak û Duzceyê êrîşên li ser karkerên Kurd ên nayên qebûlkirin.
Daxuyaniya DEM Partiyê wiha ye:
Nirxandina êrîşan wekî ku bûyerên takekesî, encamên xeternak ên zihniyeta nijadperest e. Di vê serdema hestiyar a ku em tê de derbas dibin, divê derfetê nedin kesên ku dixwazin gel bînin beramberî hev. Em bang li rayêdarên berpirsiyar dikin ku van êrîşan bi hemû aliyên wan ve lêkolîn bikin, sûcdar li pêşiya dadê hesab bidin.”
Êrişeke din Li Duzceyê pêk hat
Êrişek din li ser karkerên Kurd li navçeyên Cumayerî û Gumuşova yê Duzceyê pêk hat. Karkerên ku ji Merdînê wekî karkerên demsalî çûn e Duzceyê rastî êrişên nijadperestan hatine.
Komek êrişî karkeran kirine û kesek di destê vî de kêr hebû gef li karkeran xwar.
(AY)
