Ji bo nûçeya tirkî / İngilîzî bitikîne
Platforma rojnamegeriya afirîner a bi navê Brush & Bow ku navenda wê li Ingilîstanê ye, di çarçeweya ‘Projeya Modelên Rol ên Jin’ de cîh da portreya stranbêja kurd Suna Alan û strana wê ya bi navê “Nadia”yê. Alanê ev stran di şexsê keça kurd a êzîdî Nadia Muradê de ji bo hemû jinên êzîdî çêkiriye ku ku ji aliyê DAIŞê ve dîl hatibûn girtin.
Aktîvîsta kurd a êzîdî Nadia Murad, di sala 2014an de tevlî sedan jinan di dema êrîşên DAIŞê de hatibû revandin û bi mehan di destê wan de dîl hatibû girtin. Murad her weha ji bo Xelata Aşitiyê ya Nobelê wekî namzet hatibû nîşandan û 5ê Çiriya Pêşiyê hatibû aşkerekirin ku Murad hêjayî xelatê hatiye dîtin. Nadia Muradê bi parêzer Amal Clooney, hevsera George Clooney re di NYê de serpêhatiyên xwe vegotibû, pirtûkek nivîsandibû û bûbû Qasida Pakiyê ya Neteweyên Yekgirtî.
Nadia Muradê bandoreke mezin li Alanê kiriye
Nadia Murad di 2016an de ji bo ku bi parlamenter û dezgehên mafê mirovan re hevdîtinan pêk bîne çûbû Ingilîstanê. Hunermend Suna Alanê weke nûçagihanekê di serdana Nadia Muradê de, pê re hevpeyvînek kiribû û bandoreke mezin li Suna Alanê kiribû. Alanê li ser vê yekê di heman salê de ji bo piştgiriya jinên êzîdî yên ji aliyê DAIŞê ve hatine dîlgirtin, du konser çêkiribû. Her weha ji bo ku hîn zêde ev mijar bikeve rojevê strana xwe ya bi navê ‘Nadia’ amade kiribû.
'Çîroka jina kurd e'
Hunermend Alanê ji bo ew dema ku wê û Nadia Muradê hev dîtine wiha got: “Bi Nadia Muradê re nêzîkê saetekê min hevdîtin kir. Hevdîtinê bandoreke mezin li min kir. Di dengê wê yê şikestî de êşên ku laşê wê yê ciwan tijî dikir hebû û di çavên wê de jî qêrîna jinên kurd ên dîlgirtî hebû. Ol, nijad, çîn û zayendên wan çi dibe bila bibe piştgiriya hemû kesan dixwest. Dema wê xeber dida barê min hîn girantir dibû. Piştî vê hevpeyvînê min ji bo saziyên ku rewşa jinên êzidî yên ji hêla DAIŞê ve hatibûn revandin, dişopandin du konser dan. Dû ra ev besteya ku li ser Nadiayê ye derket holê. Mijara vê besteyê di şexsê Nadiayê de jina kurd û çîroka kurdan e. Çîroka kesên ku li hemberî tu êşan çok nedanîne û hêvî xurttir kirine…”
Hunermend Suna Alan dibêje, ji van peyvên Nadiayê derketine ku di dema hevpeyvînê de kiribûn: “Di dinyayê de ji bo min tenê dayîka min hebû. Dema ku min birin Musilê û li wê derê firotin, tam wê demê min dayîka xwe û birayên xwe ji bîra kir. Ji ber ku tiştên li wê derê li jinan dihate kirin ji mirinê girantir bûn.’”
NADIA | |
Lê dayê, dengê te nayê Lê dayê ketim bîra kûr, bîra reş, deng bide! Jiyan tarî, azadî dûr, brîndar bûm lê dayê Jiyan tarî, azadî dûr, mirin xweş bû lê dayê Dûr e dûr, dûr e dûr çavên te! Dûr e dûr, dûr e dûr çavên te! *** Lê dayê, rabûm li xewnê Te bang dikir navê min, kena te li bîra min Ez im Nadia, xezala te, gulêbûka Şingal ê Zarokek dilgeş bûm ez, mezin bûm di nav şadî Nêz e nêz, dengê te, nêz e nêz hêvî! Nêz e nêz, çavên te, nêz e nêz ronahî! |
Derbarê Platforma Rojnamegeriya Afirîner (Brush&Bow) | |
Armanca platforma rojnamegeriya afirîner a bi navê Brush & Bow ew e ku dixwaze bi rêya huner û muzîkê di nava mijarên civakî de çîrokên şexsî peyda bike. Platform, ji ber sedemên paşguhkirina polîtîk, ekonomîk û sîstematîk bi gelên bindest re dixebite. Bi "Projeya Modelên Rol ên Jin" ku îsal destpê kiriye, platform dixwaze bibe dengê jinên ku zor û zehmetiyan dikşînin û ji bo armancên xwe dixebitin. Platform di daxuyaniya xwe de wiha dibêje; 'Me fam kir ku di rewşa heyî de her çiqas modelên rol hebin jî ji aliyê medyayê ve hêjmareke kêm a jinên navdar tên nîşandayîn. Perspektîfeke bi vî rengî yanî di çarçeweya modela rol a jinek dişibe çi de tune ye. Em dixwazin ji hemû çand, temen û şiyanan jinan derxînin ber çavan. Yanî em dixwazin îlham bidin jinan.' |
(FD)
.jpg)
