Şewatê di 26ê Tîrmehê de li qada daristanî ya taxa Yakuplar a navçeya Orhaneli ya Bursayê dest pê kir û ber bi navçeya Harmancikê ve belav bû. Midaxeleya ekîbên agirkujiyê û Rêveberiya Herêma Daristanan didome.
Di saetên êvarê de şewatê bandorek zêde li qada daristanê a di navbera taxên Çakmak û Çamoglû de kir û midaxeleya bi balafir û helîkopteran dest pê kir.
Li gorî Ajansa Anadoluyê, niştecihên herêmî bi tankerên avê yên ku li pişta traktorên xwe ve girêdayî ne, piştgiriyê didin ekîban.
Her weha rêya sereke ya Orhaneli-Harmancıkê, ku ji ber şewatê weke demkî hatibû girtin, di saetên şevê de dîsa ji trafîkê re vebû.
Çar kes mirin
Ji ber şewata ku çar roj berê dest pê kir û ji ber bayê belav bû, deverên bejayî yên Dutluca, Ilıcaksu, Çamoglu, Çatalsogut û Çakmak ên navçeya Harmancik, Yakuplara navçeya Orhaneli û Gediklera navçeya Buyukorhanê wekî tedbîr hatin valakirin.
Dema tankerek av ji bo herêma şewatê biriye, di rê de qulupîye û di encamê de 3 kesan jiyana xwe ji dest dan. Xebatkarê agirkujiyê Ramazan Şaşkin jî di dema midaxeleya şewatê de dilê wî sekiniye û miriye.
Gumanbarê bi navê Ufuk A. ku ji ber şewatê hatibû desteserkirin, ji aliyê dadweriya cezê û aştiyê ya nobedar ve hate girtin.
Rola mirovan di şewatên daristanan de
Lêkolînên li ser şewatên daristanan li Tirkiyeyê nîşan didin ku çalakiyên mirovan di beşek mezin a van şewatan de roleke girîng dilîzin. Gelek ji şewatan, ku di salên dawî de zêde bûne, ji ber xeletiya mirovan an jî kiryarên bi zanebûn çêdibin.
Li gorî lêkolînan, ji sedî 90 zêdetir şewat ji ber mirovan çêdibin. Ev rêje ji ber faktorên wekî dûvikên cixareyê yên bi bêhemdî hatine avêtin, şewitandina kok û bermahiyên gîhayan û çirûskên ji xetên elektrîkê çêdibe derdikeve holê. Her weha wêrankirina daristanan a bi zanebûn û şewatên ji bo avakirinê vê rewşê girantir dikin.
Li gorî rapora sala 2023an a Komeleya Daristanvanên Tirkiyeyê (TOD), sedemên sereke yên şewatên ji ber mirovan çêdibin û ev jî çalakiyên wekî şewatên li seyrangehan, paqijkirina zeviyan û avakirina bêdestûr in. Di raporê de, TOD destnîşan dike ku piraniya şewatan ji ber xeletiyên mirovan çêdibin û belavbûna şewatan a bi awayekî lez jî ji ber krîza avhewayê zêde dibe.
