Ji bo nûçeya tirkî bitikîne
Serokwezîriya Srî Lankayê piştî ku Serokê Dewletê Gotabaya Rajapaksa welat terikandiye rewşa awarte (OHAL) ragihandiye.
Li Srî Lankayê piştî ku xwepêşandêran bi ser qesra serokatiyê de girtibû serokê wî welatî Gotabaya Rajapaksa îro (13ê Tîrmehê) aşkere kiribû ku ew ê dev ji wezîfeya xwe berde. Rajapaksa bi balafireke leşkerî welatê xwe bicih hêştiye û çûye Maldîvê.
Li gor nûçeya rojnameya The Guardianê, Ofîsa Serokwezîriya Srî Lankayê di daxuyaniya xwe ya derbarê mijarê de ragihandiye ku "Piştî ku xwepêşanderan hewldanên xwe yên ji bo serdegirtina dezgehên hikûmetê berdewam kirin, rewşa awarte hatiye ragihandin".
Hêzên Hewayî yên Srî Lankayê jî piştrast kiriye ku Rajapaksa, hevjîna wî û du pasewanên ewlehiyê îro serê sibê li balafireke leşkerî siwar bûne û welat terikandine.
Çi bûbû?
Gelê Srî Lankayê di meha Adarê de piştî ku rojê bi qasî 13 saetan elektrîk dihat qutkirin xwepêşandanên xwe zêde kirin.
Di navbera xwepêşanderên ku di 9ê Gulanê de li derdora Ofîsa Serokwezîriya Srî Lankayê kom bûbûn û alîgirên hikûmetê de pevçûn derketibû; Li ser vê yekê, yekîneyên leşkerî yên li paytext Colomboyê dest bi midaxeleyê kiribû.
Piştî bûyerên tûndiyê li seranserê welêt qedexeya derketina derve hatibû ragihandin û hukûmeta Srî Lankayê ferman dabû her kesê ku di dema xwepêşandanan de zirarê bide mal û milkên dewletê were gulebarankirin.
Serok Rajapaksa qebûl kiribû ku di 13ê Tîrmehê de îstifa bike.
Di xwepêşandanên ku li seranserê welêt belav bûne de, parlamenterê partiya desthilatdar û 2 polîs jî di nav de 8 kes mirine û herî kêm 250 kes jî birîndar bûne.(SD/AY)
