Ji bo nûçeya Tirkî / İngilîzî bitikîne
Serdozgeriya Komarî ya Enqereyê bi tohmeta ku “bi rengekî aşkere neteweya Tirk, dewleta Komarî ya Tirkiyeyê, hikûmeta wê, leşker û hêzên emnî yên dewletê biçûk xistine”, “propagandaya rêxistina terorê kirine”, “li dij Qanûna Partiyên Siyasî derketine” û “heqaret li Serokomar kiriye” derbarê 8 parlamenterên Partiya Demokratîk a Gelan (HDP) de fezleke amade kiriye.
Li gorî nûçeya Ajansa Anadolûyê (AA) ji bo Osman Baydemîr, Alîcan Onlu, Feleknas Ûca, Sîbel Yîgîtalp, Nadîr Yildirim, Dîlek Ocalan, Mîzgîn Irgat û Garo Paylanî fezleke hatiye amadekirin.
Di fezlekeyan de Serdozgeriyê di çarçoveya xala 83yê ya Destûra Bingehîn de daxwaza rakirina parêzbendiya parlamenteran kiriye û ji bo pêşkêşî Serokatiya Parlamentoya Tirkiyeyê bike ji Wezareta Dadê re şandiye.
Di heman demê de Serdozgeriya Komarî ya Enqereyê ji bo Osman Baydemîr û Lezgîn Bîngolî destûra daxwaza vekirina lêpirsînê kiriye. Daxwaz ji Midûriyeta Giştî ya Karên Cezayan a Wezareta Dadê hatiye kirin.
9 Parlamenterên HDPyê girtî ne (Parlamenterên Serdema 26em)
Selahattîn Demîrtaş – Hevserokê Giştî yê berê
Fîgen Yuksekdag – Hevseroka Giştî ya Berê (Mafê parlamenteriya wê û endamtiya HDPyê 21yê Sibatê ya 2017ê hatibû betalkirin)
Idrîs Balûken – Parlamenterê Amedê
Selma Irmak – Parlamentera Colemêrgê
Gulser Yildirim – Parlamentera Mêrdînê
Ferhat Encu – Parlmenterê Şirnexê
Abdullah Zeydan – Parlamenterê Colemêrgê
Çaglar Demîrel – Parlamentera Amedê
Bûrcû Çelîk – Parlamentera Mûşê
(PT/FD)
