Rojnamegerên Sînornenas (RSF), Ji bo Aştiyê Karîkatur û Mafên Karîkaturîstan desteserkirin û êrişa li dijî kovara LeManê şermezar kirin.
Saziyên navneteweyî yên bi navê Ji Bo Aştiyê Karîkatur, Mafên Karîkaturîstan û RSF ji rayedaran xwest ku berpirsên kovarê û karîkaturîstan demildest serbest berdin û ewlekariya tevahiya xebatkarên kovarê saz bikin.
Mîlîtanên olperest bi dar û beran êrişî avahiya LeManê kirin
Di daxuyaniyek hevbeş de, her sê saziyan diyar kirin ku hewldana lînçkirina li ser Kovara LeManê û karmendên wê, li Tirkiyeyê êrîşek nû ye ku li ser azadiya çapemeniyê. Di daxuyaniyê de hatiye bibîr xistin ku Tirkiye di Endeksa Azadiya Çapemeniyê ya Cîhanê ya RSFê de di rêza 159emîn de ye û weha hatiye gotin, "Rojnameger li Tirkiyeyê bi awayeke sîstematîk têne astengkirin û niha jî karmendên edîtoriya kovara LeManê dibin hedef."
Nûnerê Tirkiyeyê yê RSFê Erol Onderoglu, ku di daxuyaniyê de cih dane nêrînên wî, êrîş bi van gotinan nirxand:
"Em vê êrîşa li ser azadiya çapemeniyê bi tundî şermezar dikin. Tu tiştek nikare tûndkariyek bi vî awayî rewa bike. Her wiha di rojên dawî de hêzên ewlekariyê ji bo ku Meşa Rûmetê tepeser bike li kolanan tijî ne, lêbelê di dema êrişa li dijî kovara LeManê de dereng midaxele kir ku em vê yekê fêm nakin, çima wisa kirin. Em bang li rayedaran dikin ku tavilê endamên çapemeniyê yên girtî berdin. Divê ewlehiya karîkaturîstan niha fikara wan a sereke be."
Serokê Ji Bo Aştiyê Karîkator, Kak (Patrick Lamassoure) jî bal kişand ser zextên ku li ser karîkaturîstan û got:
"Wekî keleha dawî ya karîkaturan, LeMan ji her demê bêtir, bi zextên nayên qebûlkirin re rû bi rû ye. Li Tirkiyeyê karîkatur bi awayeke sîstematîk weke amûrek sîyasî tên nirxandin û vê nêrînê şermezar dikin û ji vê êrîşa darazî ya li ser kovareke mîzahê ku sembola wî welatî ye bi fikar in. Em piştgirîya bê şert û merc didin karîkaturîst û tîma edîtorî ya LeManê ku divê tavilê werin berdan."
Dîrektorê Mafên Karîkaturîstan Terry Anderson jî îdia kir ku bûyerên li Stenbolê li ser "derewên polîtîk" hatine sazkirin:
"Wateya rastîn û niyeta karîkatur pir eşkere ye. Bûyerên ku di 48 saetên dawî de li Stenbolê qewimîn, dîmenên tûndkariya polîsan ên li ser medyaya civakî belav dibin û kombûna li derdora ofîsa LeManê xwe dispêre dereweke. LeMan ji aliyê firsendperestên siyasî ve tê tirsandin û karîkatur jî bi armanca zextê tê îstismarkirin. Em dixwazin kesên hatine desteserkirin serbest bibin û demildest dawî li darizandinên bê bingeh were anîn."
Lêpirsîn ji ber wê îdiayê hatibû vekirin ku karîkatûra pêxember Mihemmed û Mûsa hatiye çêkirin. Di çarçoveya lêpirsînê de karîkaturîst Doğan Pehlevan ku wî karîkatura navborî xêz kiribû, Dehênerê Giştî ê Kovarê Zafer Aknar, çêkerê grafîkê Cebrail Okçu û Dehênerê Giştî ê Kovarê Ali Yavuz bi tohmeta ku "kîn û dijminahî xistiye nava gel” hatin girtin.
Biryara zeftkirinê ji bo hevkarê damezrîner û Dehênerê Giştî ê Kovara LeManê ê berê Tuncay Akgun ku li derveyî welêt e û Dehênerê Giştî ê Kovarê Aslan Ozdemir hate dayîn.
(HA/AY)
