Tirkiyeyê careke din bi operasyonên li dijî şaredariyên CHPê dest bi rojê kir. Şaredarên Bajarên Antalya, Edene û Semsûrê hatin desteserkirin.
Li gorî nûçeya AAyê, di lêpirsîna "bertîlê" ya ku ji aliyê Serdozgeriya Komarê ya Antalyayê ve hatiye destpêkirin de 3 gumanbar ku Şaredarê Bajarê Antalyayê Muhittin Bocek jî di nav de ye, hatin desetserkirin.
Her sê gumanbar birine rêvebiriya emniyeta bajêr.
Operasyon li Edene û Semsûrê jî pêk hat
Di lêpirsîna rêxistina sûc a Aziz İhsan Aktaş de biryara desteserkirina Şaredarê Bajarê Mezin ê Edeneyê Zeydan Karalar û Şaredarê Semsûrê Abdurrahman Tutdere jî hatiye dayîn. Her weha herdu şaredar jî hatin desteserkirin.
Tê îdiakirin ku Azîz Îhsan Aktaş berpirsê rêxistina sûc e û bertîl daye şaredar, rêvebirên şaredariyan û îhale ji wan stendine. Serdozgeriya Komarî ya Stenbolê li ser vê yekê lêpirsan dabû destpêkirin û lêpirsîn hê jî didome.
Di çarçoveya lêpirsînê de, lêkolîna gotin û belgeyên şahid û hin gumanbarên girtî ku di şîrketên girêdayî Aziz İhsan Aktaş de dixebitin, bi dawî bûye. Hin gumanbar û şahid piştî îfadeyên xwe li gorî poşmaniya bi bandor dane serbest bûbûn.
Cîgirê şaredar jî hat desteserkirin
Şaredarê Buyukçekmeceyê Hasan Akgun bi îdiaya ku li beramber destûra ruxsat û îskanê ji xwediyên şîrketan daxwaza xaniyan kiriye û her weha ew neçarî vê tiştê kirine hatibû girtin. Li şûna Akgun, Ahmet Şahin weke cîgirê şaredar hatibû wezîfedarkirin. Şahîn jî di nav de 4 kes hatin desteserkirin.
9 şaredar girtî ne, 4 şaredar jî desteserî ne
Di çarçoveya operasyonên li pêy hev de Şaredarê Bajarê Mezin ê Stenbolê Ekrem Îmamoglu, Şaredarê Esenyurtê Ahmet Ozer, Şaredarê Şîşliyê Resûl Emrah Şahan, Şaredarê Beşîktaşê Riza Akpolat, Şaredarê Beykozê Alaattîn Koseler, Şaredarê Gazîosmanpaşayê Hakan Bahçetepe, Şaredarê Avilarê Utku Caner Çaykara , Şaredarê Beylîkduzuyê Mehmet Murat Çalik, Şaredarê Büyükçekmeceyê Hasan Akgün û Şaredarê Îzmîrê yê berê Tunç Soyer hatin girtin.
Şaredarên Manavgat, Antalyayê, Semsûrê û Edeneyê hê jî desteserkirî ne.
