Êrîşên hewayî yên artêşa Îsraîlê yên li dijî Lubnanê yên bi navê “Tîrên Bakur” di roja çarem de berdewam dike.
Artêşa Îsraîlê êrişî herêma Bekaayê ku li başûr û rojhilatê Lubnanê ye kiribû. Arteşa Îsraîlê îdia dike ku wan li wan herêman êrişî hedefên Hîzbûllahê kiriye.
Di encama êrişan de artêşa Îsraîlê, 50 jê zarok, 95 jin û 4 xebatkarên tenduristiyê herî kêm 654 kes kuştin û zêdetirî 2000 kes jî birîndar kirin û her weha bi sed hezaran kes jî koçber kirin.
Li gorî nûçeya televîzyona El-Meyadîn a Beyrûtê, balafirên şer ên Îsraîlê êrişî Deriyê Sînor ê Matrabayê ku di navbera Lubnan û Sûriyeyê de ye kir. Êriş li deriyê aliyê Sûriyeyê hat kirin û di encamê de gelek sivîl birîndar bûne.
Artêşa Îsraîlê li ser platforma medyaya civakî Xê daxuyanî da û got, “ Balafirên şer ên Îsraîlê, binesaziya ku li ser sînorê Lubnan û Surîyeyê ku Hîzbûllah ji bo anîna çekan ji Sûriyeyê bo Lubnanê bikartîne, kir armanc.”
Di daxuyaniyê de her wiha hat diyar kirin ku "li dijî hewldanên veguhestina çekan ji axa Sûriyê bo Lubnanê." êrîş dê berdewam bin.
70 hezar kes li 533 stargehan hatin bicihkirin
Wezîrê Karên Navxweyî ê Lubnanê Bessam El-Mevlevî ragihand ku 70 hezar kes li 533 stargehên ku ji bo kesên ji ber êrîşên Îsraîlê koçber bûne hatin bicihkirin.
Li gor nûçeya Ajansa Anadoluyê Mevlevî di civîna çapemeniyê ya ku li paytext Beyrûtê li dar xist de der barê welatiyên ku ji ber êrîşa hewayî ya artêşa Îsraîlê ya li ser Lubnanê reviyane de agahî da.
Mewlewî bal kişand ser hewildanên wan ên ji bo peydakirina hemû hewcedariyên nexweş û astengdarên ku ji ber êrîşên hewayî malên xwe terikandine û destnîşan kir ku wan 70 hezar û 100 kesên ku piştî êrîşên Îsraîlê neçar man malên xwe biterikînin li 533 stargehan bi cih kirin.
Mewlewî diyar kir ku di vê heyamê de 13 hezar û 500 Sûriyeyî ji Lubnanê derketin û vegeriyan welatê xwe û got, "Li gorî vê em dikarin bêjin ku dê Sûriyeyî vegerin."
Êrîşên Îsraîlê yên li dijî Lubnanê
Artêşa Îsraîlê ji 23ê Îlonê ve heta niha bi sedan êrîşên esmanî li ser bajarên başûrê Lubnanê û her wiha herêmên Bekaa û Baalbek pêk anîne.
Li gorî daneyên Wezareta Tenduristiyê ya Lubnanê, di êrîşên Îsraîlê de herî kêm 654 kes mirine.
Pêla koçberiyê ji herêmên başûrê welêt ber bi paytext Beyrûtê û bakurê welêt dewam dike, derbarê hejmara koçberan de du daxuyaniyên cuda hatin dayîn.
Wezîrê Karên Derve yê Lubnanê Abdullah Buhabîb diyar kir ku hejmara kesên ku ji ber êrîşên Îsraîlê ji cih û warên xwe bûne nêzî 500 hezarî ye, Wezîrê Jîngehê yê Lubnanê Nasir Yasîn jî ragihand ku ev hejmar ji 150 hezarî zêdetir e.
(VC/AY)
