Artêşa Îsraîlê "bi mebesta hedefgirtina bernameya nukleerî" li dijî Îranê êriş dabûn destpêkirin û Îranê jî êrîşên tolhildanê li dijî Îsraîlê da dest pê kirin. Şerê di navbera wan de di roja 5emîn(17ê Hezîranê) de ye.
Êrîşên herdu aliyan di sê rojên pêşîn de dijwar bû û duh şev dijwariya şer hinek kêm bû. Lêbelê piştî daxuyaniyên Serokê DYAyê Donald Trump dîsa rageşî zêde bû.
Îsraîlê êrişî tesîsên nukleerî û baregehên leşkerî yên Îranê kir
Daxuyaniyên Trump
Serokê DYAyê Donald Trump di postek li ser hesabê xwe yê Truth Socialê de got, "Divê Îranê peymana ku min ji wan re gotibû îmze bikira. Çi şerm e, windahiyek mezin a mirovahiyê ye. Îran nikare bibe xwediyê çekên nukleerî. Min ev gelek caran gotiye. Divê her kes li Tehranê tavilê were derxistin."
Trump ji Lûtkeya Rêberên G7ê li Kanadayê vegeriya û di Air Force One de jî daxuyanî da rojnamegeran.
Trump diyar kir ku ew dixwaze "dawîyek rastîn" ji bo peymana nukleerî ya bi Îranê re hebe ew ê pêşketinên li Rojhilata Navîn ji Odeya Rewşê ya Qesra Spî bişopîne.
Trump, behsa valakirina Tehranê kir û got ku ew dixwaze "mirov di ewlekariyê de bin" û got, "Hûn ê di du rojên pêş de bibînin. Heta niha kesî leza xwe neguheriye."
Trump her wiha îdia kir ku Îran "pir nêzîkî" pêşxistina çekên nukleerî bûye.
*Fotograf: AA
Îranê bi mûşekên balîstîk êrişî Îsraîlê kir
Artêşa Îsraîlê diyar kir ku di saetên sibehê de Îranê bi qasî 20 mûşekên balîstîk êriş kiriye.
Di daxuyaniyê de agahî nehat dayîn ku bê ka çend mûşek ji hêla pergalên parastina hewayî ve hatine îmhakirin, lê çapemeniya Îsraîlê ragihand ku mûşek li du deverên cuda yên li navenda welêt ketine.
Hat gotin ku yek ji deverên mûşek lê letine li herêma Gush Dan a Tel Avîvê ye û ya din jî li bajarê Herzilya yê nêzîkî Tel Avîvê ye.
Xizmeta alîkariya lezgîn a Îsraîlê Stêrka Dawid a Sor ragihand ku 10 kes di êrîşan de bi sivikî birîndar bûne, di heman demê de wêneyên li ser medyaya civakî nîşan didin ku dû ji deverên ku mûşek lê ketine bilind dibe.
Îran: Êrîş di saetên pêş de wê zêdetir bibin
Televîzyona dewleta Îranê daxuyaniyên fermandarê Hêzên Bejayî yên Artêşa Îranê, Kiyoumers Heyderî yên derbarê tolhildana li dijî Îsraîlê de weşand.
Heyderî got, "Êrîşên dijwar ên bi dronan bi çekên nû û pêşketî dest pê kirine û dê di saetên pêş de dijwartir bibin."
*Fermandarê Hêzên Bejayî yên Artêşa Îranê Kiyoumers Heyderî. (Fotograf: IRNA)
Îsraîl îdia kir ku Fermandar Elî Şadimanî hatiye kuştin
Artêşa Îsraîlê îdia kir ku wan Elî Şadimanî, fermandarê Pasdarên Şoreşa Îranê, di êrîşeke asmanî de kuştiye.
Di daxuyaniya artêşê de hat îdia kirin ku balafirên şer piştî wergirtina îstîxbaratê nîvê şevê Baregeha Navendî ya Xetam el-Enbiya ya Artêşa Şoreşê ku li navenda Tehranê ye bombebaran kirine.
General Şadimanî di 14ê Hezîranê de li şûna Gulam Elî Reşîd wek Fermandarê Baregeha Navendî ya Xatam el-Enbiya hate tayînkirin. Gulam Elî Reşîd di 13ê Hezîranê de di êrîşeke Îsraîlê de hatibû kuştin.
Der barê şerê Îsraîl-Îranê de
Di 13ê Hezîranê de Îsraîlê êrîşên berfireh li dijî tesîsên nukleerî yên li bajarên cuda yên Îranê û fermandarên payebilind ên artêşê pêk anîn.
Serfermandarê Giştî yê Îranê, Fermandarê Giştî yê Artêşa Şoreşê, hin fermandarên payebilind û neh zanyarên nukleerê di êrîşan de hatin kuştin, di heman demê de hejmara giştî ya qurbaniyên sivîl jî wekî 224 hate ragihandin.
Hat ragihandin ku di êrîşa mûşekî ya balîstîk a artêşa Îranê ya li dijî Îsraîlê de 24 kes hatine kuştin û zêdetirî 500 kes jî birîndar bûne.
